Auðkúla 1

Ásgeir tekur við búinu af foreldrum sínum 2013. Karen flytur á Auðkúlu 2018. 

Býli:  Auðkúla 1.

Staðsett í sveit:  Við Svínavatn í Húnavatnshreppi, 541 Blönduós.

Ábúendur: Ásgeir Ósmann Valdemarsson og Karen Ósk Guðmundsdóttir.

Fjölskyldustærð (og gæludýra): Við eigum tvö börn. Emil Jóhann, tæplega 2 ára og Dagbjörtu Ósk, 9 mánaða. Gæludýr eru heimiliskötturinn Tumi, tíkurnar Tara og Kristal og fjósakötturinn Birgitta.

Stærð jarðar?  250 hektarar.

Gerð bús? Nautakjötsframleiðsla.

Fjöldi búfjár og tegundir?  Höldum rúmlega 100 holdakúm undir naut þetta haustið. Heildarfjöldi nautgripa 200–250 eftir árstíma. 

Eigum 8 hross okkur til gagns og gamans.

Hvernig gengur hefðbundinn vinnudagur fyrir sig á bænum? Er til eitthvað sem heitir hefðbundinn vinnudagur í sveitinni? Gjafir kvölds og morgna allt árið en þess á milli er það mjög árstíðabundið og fjölbreytt.

Skemmtilegustu/leiðinlegustu bústörfin? Skemmtilegasta starfið er að taka á móti sprækum kálfum þegar allt gengur vel. Annars eru allflest störfin skemmtileg ef vel gengur.

Leiðinlegast eru heilsufarstengd vandamál hjá gripunum og að elta óþekkar kvígur.

Hvernig sjáið þið búskapinn fyrir ykkur á jörðinni eftir fimm ár? Meiri og betri húsakostur fyrir kýrnar. Meiri túnrækt heima við og vonandi verður Angus-blóðið orðið ríkjandi í hjörðinni.

Hvar teljið þið að helstu tækifærin séu í útflutningi íslenskra búvara?  Sjáum tækifæri í sölu á vöru beint frá býli. Styttri leið frá bónda til neytanda. Þurfum að halda áfram á sömu braut varðandi hreinleika afurða okkar. Minnkum innflutning og einblínum frekar á að framleiða úrvals vöru innanlands. 

Þurfum einnig að huga að aukinni framleiðslu korns til manneldis svo íslenskur landbúnaður standist samkeppni vegna breytinga á neysluvenjum fólks.

Hvað er alltaf til í ísskápnum? AB mjólk og nýmjólk.

Hver er vinsælasti maturinn á heimilinu? Grillað folaldakjöt og tilheyrandi með því.

Eftirminnilegasta atvikið við bústörfin? Mörg skemmtileg atvik en efst í minni okkar er þegar við slepptum Mætti (hreinræktuðum Angus bola) í kýr síðastliðið haust.