Eignarhald á landbúnaðarlandi í Útvarpi Bændablaðsins
Ný skýrsla um eignarhald á landbúnaðarlandi á Íslandi sýnir fram á að meirihluti lögbýla er ekki í virkri landbúnaðarnotkun. Tæpur fimmtungur góðs og mjög góðs ræktarlands er nýtt eða um 90.000 hektarar af 486.000.
Skýrslan skoðar þróun regluverks um eignarhald á landbúnaðarlandi og samanburð við önnur Norðurlönd, ESB og Bretland. Meginefni hennar er hvernig tryggja megi sjálfbæra nýtingu landbúnaðarlands, fæðuöryggi og byggð í dreifbýli.
Helstu niðurstöður eru að íslenskt regluverk sé tiltölulega frjálslegt miðað við mörg nágrannalönd. Jarðalög frá 1976 fólu áður í sér víðtækt eftirlit með jarðakaupum, búsetu og notkun lands, en með nýjum jarðalögum árið 2004 voru flestar takmarkanir felldar niður til að færa viðskipti með jarðir nær almennum fasteignamarkaði. Árið 2020 voru þó sett inn ákvæði til að takmarka jarðasöfnun, þannig að leyfi ráðherra þarf ef aðilar eiga þegar fleiri en fimm jarðir eða yfir 1.500 hektara lands.
Í nýjasta þætti Útvarps Bændablaðsins er rætt við Ásdísi Hlökk Theodórsdóttur, skipulagsfræðing, sem er annar höfunda skýrslunnar. Í þættinum er einnig rætt við Ingva Stefánsson, formann svínabænda, um það hvaða áhrif innganga í ESB myndi hafa á búgrein hans hér á landi.
