Þungarokkshátíðin Sátan haldin í Stykkishólmi næstu helgi

Þungarokkshátíðin Sátan verður haldin í Stykkihólmi dagna 4.-6. júní. Þetta er í þriðja sinn sem hátíðin er haldin, en fyrsta hátíðin var haldin árið 2024.   

Gísli Sigmundsson, framkvæmdastjóri Sátunnar, segir að upphaf hátíðarinnar sé úr samtali hans við fjölskyldu sína árið 2023. „Dóttir okkar býr hér í Stykkishólmi. Við vorum í mat hjá henni og hún var að tala um að það væri uppselt á allar tónlistarhátíðirnar sem hana langaði á um sumarið. Þá kom upp sú hugmynd að búa bara til okkar eigin hátíð hér í Stykkishólmi.“ Samtalið hafi svo leitt til fundar með bæjaryfirvöldum í Stykkishólmi og tekið hafi verið vel í hugmyndina. Ári síðar var fyrsta hátíðin, sem býður upp á heimsþekktar hljómsveitir úr þungarokksheiminum, haldin við góðar viðtökur.

Golfmót á þungarokkhátíð

Hátíðin er haldin í íþróttahúsinu í Stykkishólmi sem hýsir um 800 manns. Gísli segir bæjabúa hafa tekið aðkomufólki vel, en undirbúningur fyrir hátíðina er töluverður vikurnar fyrir. Á meðan blaðamaður spjallar við Gísla um skipulag og annað tengt hátíðinni þarf hann regluleg að stíga frá símanum og taka snöggar ákvarðanir.

Aðspurður um hvort bæjarbúar sæki hátíðina segir hann að þeir séu í minnihluta. „Það er helst að heimamenn kíki við ef það eru þekktar íslenskar hljómsveitir, eins og HAM eða Skálmöld, að spila. En það eru margir sem fylgjast með okkur í undirbúninginum og kíkja við í íþróttahúsið.“

Gísli segir að í ár muni Nergal, söngvari pólsku hljómsveitarinnar Behemoth stíga á stokk á Sátunni með íslensku hljómsveitinni Misþyrmingu, en Behemoth er risi í þungarokksheiminum. „Hann fékk Misþyrmingu til að spila með sér fyrstu plötu Behemoth en sú plata er 30 ára í ár. Þarna er verk sem verður spilað á átta eða níu evrópskum hátíðum í sumar, en fyrsti flutningur verður hér á Sátunni.“

Sú nýlunda er á hátíðinni í ár að efnt verður til golfmóts samhliða tónslistarflutningi. „Okkur fannst það bara svo fáránleg hugmynd að það verður stórkostlegt,“ segir Gísli. „En þetta á að vera skemmtilegt. Ef það er ekki skemmtilegt þá erum við að gera eitthvað vitlaust.“