Erfitt að sætta ólík sjónarmið
Verðmæti efnisins sem Ísteka vinnur úr blóði fylfullra hryssna veltir um tveimur milljörðum krónum árlega í útflutningstekjur.
Mikið er í húfi fyrir fyrirtækið og búgreinin er drjúg fyrir bændur en greinin hefur sætt harðri gagnrýni vegna dýravelferðar. Starfsleyfi Ísteka var endurnýjað á dögunum og gildir til tveggja ára. Sótt var um leyfi fyrir blóðtöku úr 10.000 hryssum en var veitt fyrir 4.900 hryssum. Um 90 stóðbændur halda blóðmerar samkvæmt upplýsingum frá Ísteka.
Skiptar skoðanir eru á starfseminni meðal bænda og í samfélaginu. „Tekjur af blóðsölu úr meðalhryssu á árinu voru 128 þúsund krónur en sé eingöngu litið til úrvalsgóðu hryssnanna voru tekjurnar um 170 þúsund krónur á hvern grip. Uppgefnar tölur eru án vsk.,“ segir í pistli Kristins Hugasonar, samskiptastjóra Ísteka, í Bændablaðinu á síðasta degi ársins 2025. Hærra verð er greitt fyrir blóð sem inniheldur meira af PMSG hormóninu sem nýtt er til vinnslu lokaafurðarinnar sem Ísteka flytur úr landi.
Eftirlit með blóðmerum og blóðtakan sjálf lúta ströngum reglum og þarf eftirlitsaðili að vera viðstaddur sérhverja blóðtöku en aukin skilyrði voru sett í nýútgefið starfsleyfi.
Ólafur Þórisson er formaður búgreinadeildar hrossaræktenda hjá Bændasamtökum Íslands. Aðspurður hvort hann sjái fyrir sér að hægt sé að sætta þessi ólíku sjónarmið segir Ólafur það verða rosalega erfitt en um leið nauðsynlegt. „Við erum með anga innan hestamennskunnar sem er afar illa við þetta. Það mikilvægasta er að hafa þetta undir miklu eftirliti, rannsaka áhrifin enn betur og hafa allt enn opnara.“ Ólafur ræðir þennan umdeilda anga hrossaræktar og fleira til í miðopnuviðtali blaðsins.
