Afurðaverð hækkar
Kjötafurðastöð KS og sláturhúsið á Hellu tilkynntu nýverið um breytingar á verðskrám sínum á nautakjöti.
Mikil hreyfing hefur verið á verðskrám afurðastöðva til nautgripabænda á þessu ári. Undir lok árs 2021 hófu afurðastöðvar að hækka verð til bænda hóflega en með vorinu fór af stað skriða hækkana hjá öllum afurðastöðvunum, ef marka má heimasíðu nautgripabænda á bondi.is.
Þá greiddi SS sláturálag á alla gripi til viðbótar fyrir innlegg á árinu 2021, líkt og áður hefur verið fjallað um á síðum Bændablaðsins.
Kærkomnar hækkanir
„Þessar hækkanir eru kærkomnar en duga þó varla til að mæta gríðarlegum hækkunum á rekstrar- kostnaði nautgripabænda,“ segir Herdís Magna Gunnarsdóttir, varaformaður Bændasamtakanna og formaður nautgripadeildar BÍ.
„Nýútkomin skýrsla RML sem þið sögðuð frá á forsíðu Bændablaðsins um daginn sýndi að ekki bara voru bændur að borga rúmar 400 krónur með hverju framleiddu kíló nautakjöts árið 2021 heldur hafði launaliðurinn lækkað með hverju árinu. Og svo hefur allt hækkað gríðarlega síðan, þannig að það má hverjum vera ljóst að 30 til 40% hækkun afurðaverðs dugar hvergi til að loka þessu gati. Afurðastöðvarnar eru auðvitað að reyna að gera sitt allra besta og því er ég þakklát, en eins og ég segi, þá dugar það varla til,“ segir Herdís Magna.
Betri flokkar hækka meira
Ef verðskrár eru skoðaðar fyrir árið í ár sést að lakari flokkar hafa hækkað um 10 til 15% meðan betri flokkarnir hafa hækkað um allt að 36% og segir á heimasíðu nautgripadeildar BÍ að hækkanirnar séu nokkurn veginn í takti við þær verðhækkanir til sauðfjárbænda sem verið er að tilkynna um þessar mundir.
