Vorverkin í Eyjafjarðarsveit hófust mánuði fyrr en undanfarin ár

Í lok marsmánaðar fyrir tíu árum var sagt frá því á forsíðu Bændablaðsins að vorverkin væru hafin í Eyjafjarðarsveit, nánar tiltekið á bænum Ytri-Tjörnum.

Haft var eftir Benjamín Baldurssyni, bóndanum á bænum, að ríkjandi sunnanáttir allan marsmánuð með mildri veðráttu hafi leitt til þess að jörð væri klakalaus og því ekki eftir neinu að bíða með að hefja vorverkin. 

Hann sagði að þetta væri um mánuði fyrr en undanfarandi ár og mjög sjaldgæft að jörð sé orðin þíð svo snemma vors. „Þetta er að sjálfsögðu afar mikilvægt fyrir alla ræktun og þá sérstaklega kornræktina. Moldin er orðin ótrúlega þurr og því allt útlit fyrir að sáning geti farið fram með allra fyrsta móti í ár, þótt eflaust eigi eftir að koma einhver hret.

Farfuglarnir eru farnir að láta sjá sig, svo sem álftir, grágæsir og skógarþrestir. Þá hefur gráhegri einnig sést hér af og til síðustu daga en þeir eru frekar sjaldgæfir flækingar hér um slóðir,“ sagði Benjamín.