Vilmundur handhafi Hvatningarverðlauna garðyrkjunnar 2022
Höfundur: Guðrún Hulda Pálsdóttir
Vilmundur Hansen, blaðamaður Bændablaðsins og garðyrkjufræðingur, hlaut hvatningarverðlaun garðyrkjunnar 2022 sem afhent voru á opnu húsi Garðyrkjuskólans að Reykjum í dag.
Vilmundur er fyrrum nemandi skólans og hefur m.a. haldið utan um fésbókarsíðuna vinsælu Ræktaðu garðinn þinn sem er vettvangur þar sem hægt er að afla sér upplýsingar um allt sem tengist ræktun. Auk þess hefur Vilmundur skrifað bækur og óteljandi greinar um ræktun en hann hlaut hvatningarverðlaunin fyrir fræðslustarf.
Af sama tilefni hlaut Björn Bjarndal skógfræðingur heiðursverðlaun garðyrkjunnar og Kirkjugarðar Reykjavíkurprófastdæma fengu titilinn Verknámsstaður garðyrkjunnar 2022. Forseti Íslands, Guðni Th. Jóhannesson afhenti þeim verðlaunin.
