Vilja sveitir landsins að iðandi spilamennsku á ný

Sveitir landsmanna iðuðu á árum áður af spilamennsku. Nú er unnið að því að glæða áhugann á ný.

Bæði var keppt í félagsvist og bridds víða um land á árum áður en spilamennska hefur vegna tækni- og menningarbreytinga átt undir högg að sækja. Bridgesamband Íslands hefur brugðist við með átaki og hafa spilaklúbbar nú verið endurvaktir á nokkrum stöðum úti á landi. Þá fór Austurlandsmót í sveitakeppni í bridds fram fyrir skemmstu í fyrsta skipti í nokkur ár.

Bridgesambandið hefur, til að auka líkur á nýliðun, ákveðið að bjóða ungu fólki upp á fría briddskennslu í höfuðstöðvum Bridgesambandsins við Síðumúla í Reykjavík og er ekki ólíklegt að blásið verði til sambærilegs átaks úti á landi. Síðasta föstudag mættu nokkrar ungar manneskjur með spilaglampa í augum og höfðu sumar farið á byrjendanámskeið í bridds. Hinir ungu spilarar sögðust njóta þess mjög að fá að taka í spil og væru ákveðin forréttindi að fá leiðsögn landsliðsmanna.

Þær Thelma Björt Fransdóttir og Amelía Björt Halldórsdóttir eru vinkonur sem mættu saman. „Okkur finnst mjög skemmtilegt að spila á spil,“ sagði Thelma. „Ég spila manna reglulega heima hjá ömmu,“ sagði Amelía.

Magnús Magnússon, landsliðsmaður í opnum flokki, tók á móti nýliðunum. Hann bjó fyrir nokkrum árum í Svíþjóð og sá þá hvernig Svíar unnu kerfisbundið að því að ná til nýrra og ungra spilara með opnu húsi. Má því segja að hugmyndin sé þaðan komin.

Það er því endurnýjaður sóknarhugur í briddsfólki.