Víða ratað: Oddný Anna vill að neytendur séu meðvitaðir um hvaðan maturinn kemur
Oddný Anna Björnsdóttir, framkvæmdastjóri nýrra Samtaka smáframleiðenda matvæla og bóndi í Gautavík, er viðmælandi Sveins Margeirssonar í öðrum hlaðvarpsþætti Víða ratað.
Oddný Anna er viðskiptafræðingur að mennt og starfaði í áratug hjá stoðtækjafyrirtækinu Össuri, meðal annars úti í Kaliforníu. Hún ákvað að venda sínu kvæði í kross þegar hún flutti aftur til Íslands árið 2010 og einsetti sér að starfa í matvælageiranum og hafa þar áhrif til góðs.
„Ég sá að það var ýmislegt að í matvælageiranum hvað varðar umhverfismálin, dýravelferð og hollustu matvæla. Hvernig maturinn hafði breyst án þess að neytendur, og þar með talið ég, höfðu gert sér grein fyrir því. Ég varð eiginlega svolítið reið og fannst að ég hafði verið blekkt. Ég hafði svo mikið traust til þess sem stóð á matvælum og ég komst að því að það voru vaxandi hreyfingar úti um allt sem voru að stuðla að betra umhverfi og aukinni upplýsingu neytenda. Að gera neytendur meðvitaða um hvaðan maturinn kemur og hvað er í honum og hvaða áhrif það hefur á heilsu, umhverfi og dýravelferð. Ég ákvað að slást í hópinn og svo leiddi eitt af öðru.“
Oddný Anna er nýráðin framkvæmdastjóri Samtaka smáframleiðenda matvæla.
Oddný fór fljótlega að starfa í lífræna- og heilsugeiranum og kom að stofnun Samtaka lífrænna neytenda. Hún starfaði síðan sem framkvæmdastjóri hjá heildsölunni Yggdrasil og síðar sem ráðgjafi hjá Krónunni. Nú er hún bóndi í Gautavík í Berufirði þar sem hún og eiginmaður hennar hafa m.a. gert tilraunir með hamprækt. Að auki sinnir hún ráðgjafarstörfum og fer fyrir starfshópi sjávarútvegs- og landbúnaðarráðherra um bættar upprunamerkingar matvæla.
Hlaðvarpsþættir Bændablaðsins eru vistaðir eru undir heitinu „Hlaðan“ og eru aðgengilegir á SoundCloud og í helstu streymisveitum, s.s. Spotify, Apple Podcasts, Braker, Pocket Casts, RadioPublic og Google Podcasts.
