Vanræksla kærð til lögreglunnar

Matvælastofnun tilkynnti þann 9. apríl sl. að stofnunin hefði kært til lögreglu alvarlega vanrækslu á nautgripum á lögbýli á Norðurlandi vestra.

„Við eftirlit sem framkvæmt var með aðstoð lögreglu fundust 29 dauðir nautgripir í gripahúsi. Í kjölfarið aflífuðu starfsmenn stofnunarinnar 21 grip til viðbótar á staðnum sökum slæms ástands, allt gripir sem voru hýstir í húsinu. Aðrir nautgripir, sem hafði verið haldið úti við, voru hýstir yfir nóttina, en síðan voru þeir færðir til slátrunar daginn eftir. Hræjum og skrokkum hefur þegar verið fargað á viðurkenndum urðunarstað“, segir í tilkynningu Matvælastofnunar.

Umráðamaður sviptur heimild til dýrahalds

Þar kemur einnig fram að umráðamaður dýranna hafi verið sviptur heimild til dýrahalds tímabundið, eða þar til dómur fellur í málinu. „Í kæru til lögreglu gerir stofnunin þá kröfu að umráðamaður verði með dómi sviptur heimild til að hafa búfé í umsjá sinni, versla með þau eða sýsla með þau með öðrum hætti. Málið er nú til frekari rannsóknar hjá lögreglunni á Norðurlandi vestra.“

Stjórnvaldsákvarðanir í mars

Matvælastofnun tilkynnti enn fremur um stjórnvaldsákvarðanir á hendur búum og afurðastöðvum í mars. Kjúklingasláturhús á Suðurlandi var sektað vegna brota á dýravelferð sem uppgötvuðust við eftirlit. Kúabú var svipt mjólkursöluleyfi þar sem gæði mjólkur reyndust ófullnægjandi.

Dagsektir voru lagðar á kúabú á Suðurlandi vegna brota á dýravelferð. Of mikill þéttleiki reyndist vera í stíum, klaufhirðu ábótavant og kálfar bundnir. Einnig voru dagsektir lagðar á hrossa- og sauðfjárbú á Norðausturlandi vegna brota á dýravelferð. Þá var sláturhús á Suðvesturlandi sektað vegna brota á dýravelferð vegna fráviks við aflífun á grís. Þetta kemur fram á
Fyrir þinginu liggur nýtt frumvarp um lagareldi. Bjarkey telur það til þess fallið að skapa eins mikla sátt og hægt er. Mynd frá Patreksfirði.
vef Matvælastofnunar.