Umhverfisvænn 4x4 Subaru, hlaðinn nýjungum

Á þeim tíu árum sem ég hef skrifað um bíla hér í Bændablaðið hef ég verið duglegur að prófa nýja Subaru bíla þegar þeir hafa verið í boði, alltaf hefur mér líkað vel við þessa boxer-bíla fyrir utan hvað mér hefur fundist þeir eyða of miklu eldsneyti í samanburði við svipaða bíla, en nú er kominn nýr Subaru með rafmagnsaðstoð sem breytir eyðslunni.

 

Greinilega minni eyðsla en á fyrri árgerðunum

 

Um síðastliðna helgi ók ég rétt um 100 km prufuakstur á Subaru Forester e-boxer. Vélin er hybrid (bæði bensín og rafmagn), skilar 150 hestöflum, sjálfskiptur með 7 þrepa skiptingu og er uppgefin eyðsla 8,1 lítri á hundraðið miðað við blandaðan akstur. Fyrstu 40 km ók ég hefðbundinn innanbæjarakstur og samkvæmt aksturstölvunni var ég að eyða 9,6 lítrum á hundraðið, næstu 40 km voru á hálum þjóðvegi sem af og til var svolítill snjór á og var ökuhraðinn á bilinu 70-90 og niðurstaðan úr langkeyrslunni var 7,1 lítri á hundraðið (lítri til tveim lítrum minna en fyrri Subaru sem ég hef prófað). Eins og alla bíla sem ég prófa þá hávaðamældi ég inni í bílnum á sama stað og mældist hljóðið inni í bílnum ekki nema 69db. á 90 km hraða.

 

Sé settur hér krókur er vert að geta þess að bíllinn má draga 1870 kg kerru með bremsubúnaði.

 

Subaru öryggi og þægindi

 

Bíllinn er hlaðinn af margvíslegum aukabúnaði, brekkuaðstoð, hiti í stýri, akreinalesari, blindhornsvari sem lætur líka vita vel tímanlega ef bíll er að taka fram úr vinstra megin, neyðar-bremsuaðstoð (lætur vita með hljóðmerki ef bíllinn fyrir framan hægir óeðlilega mikið á sér). Einnig er í honum nýjung sem ég hef ekki skynjað fyrr í bíl sem ég hef prófað, en uppi á Mosfellsheiðinni ók við hliðina á mér maður á vélsleða um tíma og var ég eitthvað of mikið að horfa á hann, þetta líkaði bílnum ekki og pípti á mig og í mælaborðinu var skipun á ensku sem sagði mér að horfa á veginn. 

 

Flestir hafa keyrt bíl með bakk­myndavél, en til viðbótar við hana er önnur myndavél sem er í efri skjá sem sýnir niður á hægra framhjólið þegar bakkað er (er í nokkrum tegundum vörubíla), þennan búnað hef ég ekki séð áður í svona litlum bíl og er afar þægilegur þegar aðstæður eru þröngar. Þegar keyrt er í myrkri með háuljósin skipta þau sjálfkrafa niður á láguljósin sé bíll að koma á móti og þegar honum hefur verið mætt skiptir bíllinn sjálfur á háuljósin aftur.

 

Stillanlegt drif eykur akstursgetuna

 

Hægt er að stilla drifið á X-mode eða SI-drive. X-mode er fyrir erfiðar aðstæður s.s. snjó, drullu eða grýtt og laust yfirborð (hægt að fara í býsna miklar torfærur á bílnum þar sem hæð undir lægsta punkt er 22 cm), en SI-drive er fyrir almennan akstur og sparakstur. Í aðstæðum þar sem yfirborð vega er mishált kemur samhverfa drifið í Subaru sér vel því það dreifir afli á milli hjóla eftir gripi þannig að bíllinn hefur alltaf hámarks grip á hjólin, en stöðugleikinn er enn betri í Subaru bílum vegna boxervélarinnar sem gerir þyngdarpunktinn neðar. Fjöðrun er mjög góð og til samanburðar við flesta aðra bíla sem ég hef prófað þá höggva Subaru bílar einna minnst í smáholum.

 

Varadekkinu var fórnað fyrir rafhlöðuna.

 

Aldrei sáttur að keyra um varadekkslaus

 

Með mótorinn fram í og rafhlöðuna aftur í er bíllinn sérstaklega stöðugur og þægilegur í akstri, en það er svolítið mikið óþægilegt að vita af því að ekkert varadekk sé í bílnum. 

 

Vegna rafhlöðunnar er vara­dekkinu fórnað, eitthvað sem er ekki ásættanlegt í vegakerfi sem við búum við, sérstaklega á tímabilinu frá janúar fram í apríl þegar allt er í holum sem höggva bæði dekk og felgur. 

 

Fyrir utan þetta eina atriði finnst mér bíllinn frábær og ekki skemmir verðið sem er afar hagstætt eða frá 6.890.000 Premium og upp í LUX+ sem er á 7.490.000. Hægt væri að bæta við miklum texta um þennan bíl, en fyrir áhugasama vil ég benda á Sigurð, sölumann Subaru, hann veit þetta allt miklu betur en ég, eða á vefsíðuna www.bl.is.

 

Helstu mál og upplýsingar: