Tollar kollvarpa endurnýjanlegri orku

Áætlað er að nýir tollar sem bandarísk stjórnvöld hafa lagt á innflutning muni auka kostnað við uppsetningu á grænum orkuinnviðum.

Því er áætlað að það muni hægjast á umskiptunum yfir í loftslagsvænni orkugjafa, en tollarnir bætast við stefnubreytingu stjórnvalda sem miðar að aukinni framleiðslu á jarðefnaeldsneyti vestanhafs. Óttast er að aðgengi Bandaríkjamanna að ódýrri og áreiðanlegri orku muni versna. The New York Times greinir frá. Á heimsvísu hefur verið mikil aukning á framleiðslu á endurnýjanlegri orku sem má að miklu leyti þakka Kínverjum sem framleiða sólarsellur, vindmyllur og liþíum rafhlöður í miklu magni, af góðum gæðum og á hagstæðu verði. Bandaríkin flytja inn flestar sínar sólarsellur frá kínverskum fyrirtækjum sem starfa í Suðaustur-Asíu og koma flestar rafhlöður í bíla beint frá Kína.

Indverjar eru farnir að auka sína framleiðslu á sólarsellum og rafhlöðum, en lagðir eru lægri tollar á vörur þaðan í samanburði við Kína. Jafnframt er áætlað að kínversk fyrirtæki muni flytja sína framleiðslu til landa eins og Pakistans og Brasilíu. Enn fremur er talið að einhverjir kínverskir framleiðendur muni draga sig frá bandarískum innflutningsmarkaði. Þar sem tollarnir eru svo víðtækir er ekki talið líklegt að hægt verði að framleiða rafhlöður og sólarsellur á hagkvæman hátt í Bandaríkjunum.