Tjöldin dregin frá
Áhugaleikhúsin fara nú að hefja leikinn enda haustið að skella á. Mikið verður um skemmtan en eins og er hafa sex leikfélög valið sér verk og eru áætlaðar frumsýningar frá 21. september.
Leikfélag Kópavogs ríður á vaðið með verkinu Ferðin til Limbó, en höfundur þess er Ingibjörg Þorbergs, sem einnig á heiður af tónlistinni. Næst tekur við Leikfélag Hveragerðis með barnaleikritinu vinsæla Ávaxtakörfunni eftir Kristlaugu Maríu Sigurðardóttur, tónlist eftir Þorvald Bjarna Þorvaldsson og verður frumsýnt 28. september. Þann 11. október má hlakka til að sjá annað tilbrigði við Ávaxtakörfuna í höndum Leikfélags Sauðárkróks og svo þann átjánda setur Leikfélag Keflavíkur verkið Allir á svið – á svið, eftir Michael Frayn.
Leikfélagið Lauga sér fyrir sér að frumsýna Ævintýrabókina þann 25. október en höfundur hennar er Pétur Eggerz og tónlistin eftir Guðna Franzson. Margir hlakka væntanlega til hins klassíska verks Dýrin í Hálsaskógi eftir Torbjörn Egner sem verður sýnt á fjölum Leikfélags Vestmannaeyja í október og svo tekur Leikfélag Kópavogs fyrir verkið Rommí eftir D. L. Coburn.
Síðustu tvær sýningarnar verða eins og áður sagði í októbermánuði, en frumsýningardagurinn er ósettur enn og því um að gera að fylgjast með.
Sýningar áhugaleikhúsanna hafa yfir árin glatt hug og hjörtu landsmanna, sérstaklega þegar drungi vetrar liggur fyrir og því um að gera að hafa augun opin fyrir áætluðum sýningum.
