Þægilegur og rúmgóður fjölskyldubíll

Fyrstu helgina í september var Toyota með stóra haustssýningu á bílum með ýmsum hausttilboðum. Að lokinni sýningunni fékk ég til prófunar Toyota Avensis-skutbíl. 

 

Hugmyndin var að taka stuttan prufuakstur á bílnum, en það var svo gott að keyra bílinn að stutti prufuaksturinn endaði í tæpum 300 km.

 

Hljóðlátasti bensínbíll sem ég hef keyrt

 

Eftir að hafa sett bílinn í gang varð ég að líta á snúningshraðamælinn til að sjá hvort vélin væri í gangi, svo lágvær var vélin. 

 

Þegar ég skoðaði þetta betur sá ég að vélarrýmið var vel hljóðeinangrað og ekki bara vélarrýmið sem var svona vel hljóðeinangrað því að í akstri heyrðist nánast ekkert veghljóð. Undirvagninn er líka hljóðeinangraður, jafnvel á malarvegi heyrist nánast ekkert steinahljóð. Aðeins einu sinni heyrði ég í vélinni í akstri, en það var þegar ég var með skiptinguna stillta á SPORT og var að finna snerpuna í bílnum að ég heyrði í vélinni í akstri.

 

Sætin afar þægileg í langkeyrslu

 

Bílstjórasætið er sérstaklega gott og varð ég hrifinn af hönnun og lögun sætisins þar sem sætið hélt vel við bakið á mér, en að setjast í þetta sæti minnti mig á þegar ég settist í keppnissæti á rallýbíl fyrir nokkrum árum. 

 

Í upphafi átti bíltúrinn að vera rétt austur fyrir fjall, en endaði í kaffi í Hrauneyjum, svo gott var að keyra bílinn. Í bakaleiðinni var malarvegakaflinn að Hjálpar­fossi prófsteinninn á bílinn í malarvegaakstri. Á hlykkjóttum og holóttum malarveginum var ég hreinlega límdur í sætið og haggaðist ekki vegna hliðarstuðningsins í sætinu.

 

1,8 lítra bensínvél sem skilar 147 hestöflum

 

Bíllinn sem ég prófaði var sjálfskiptur með 7 þrepa sjálfskiptingu, þægilegur að keyra í alla staði, en ekki alveg gallalaus. 

 

Það eina sem mér fannst varasamt var hversu ég fann lítið fyrir hraðanum og var aðeins of gjarn á að vera á of miklum hraða. 7 gíra sjálfskiptingin er mjúk, ég fann aldrei þegar bíllinn skipti sér. 

Farangur­srýmið er gott, en vara­dekkið er það sem ég kalla aumingi. 

 

Felgustærðin er 17 tommur og er fínt á malbiki, en fyrir mikinn akstur á malarvegum myndi ég alveg vilja sjá þennan bíl á 16 tommu felgum sem gætu borið belgmeiri dekk sem gæfu betri fjöðrun. 

 

Stutti bíltúrinn sem upphaflega var ráðgerður endaði í tæpum 300 km og samkvæmt aksturstölvu bílsins var meðaleyðsla mín 7,6 lítrar á hundraðið, en uppgefin meðaleyðsla samkvæmt sölubæklingi er á bilinu 5,9 til 6,4 lítrar á hundraðið.

 

Óásættanlegur ljósabúnaður

 

Það er aðeins tvennt sem ég get sett út á bílinn. Það er ljósabúnaðurinn og varadekksauminginn. 

Ljósin eru óásættanleg vegna þess að það þarf að kveikja á þeim í hvert skipti sem farið er af stað til að vera með afturljós og þar af leiðandi löglegur í umferðinni. Við það dofna ljósin í mælaborðinu svo mikið að maður sér varla á mælaborðið.

 

Rausnarlegt hausttilboð á aukahlutum

 

Á haustssýningunni var fjölskyldu­bíllinn Toyota Avensis auglýstur á tilboði með aukahlutum sem voru m.a. dráttarkrókur, farangursbox á topp (stundum kallað tengdamömmubox) og  fleira. 

 

Í boði fyrir Avensis er mikið af aukahlutum og búnaði hjá Toyota. Ódýrasti Avensis er á verði frá 4.210.000 upp í 5.890.000 sá dýrasti, en nánari upplýsingar er hægt að nálgast hjá sölumanni eða á vefsíðunni www.toyota.is. 

 

Helstu mál og þyngd: