Sýndarveruleiki á ferðamannastöðum
Hönnunarstofan Gagarín hefur hannað gagnvirkar lausnir til að miðla sögunni til ferðamanna á nokkrum stöðum umhverfis landið.
Á Hofsstöðum í Garðabæ hannaði Gagarín sýningu sem fjallar um landnámsminjar sem þar fundust. Miðlunin er í formi upplýsingaskilta en einnig voru settir upp þrír sýndarveruleika-kíkjar þar sem gestum gefst tækifæri til að skyggnast inn í fortíðina. Þar sjá ferðamenn hvernig landnámsmenn byggðu hús sín, hvernig daglegt líf þeirra var og hvað þeir tóku sér fyrir hendur. Frá þessu er greint í fréttatilkynningu frá Gagarín.
Við Gullfoss geta gestir kynnst fyrsta umhverfissinna Íslands, Sigríði Tómasdóttur frá Brattholti, sem barðist gegn virkjun fossins. Með hjálp QR-kóða á fimm mismunandi stöðum opnast sýndarveruleiki þar sem leikkonan Ebba Katrín Finnsdóttir túlkar Sigríði. Gestir skynja mikilvægi fossins með augum hennar, kynnast bóndadóttur, listakonu og óþreytandi baráttukonu, allt í sömu myndinni. Vakin er sú spurning hvernig svæðið liti út ef fossinn hefði verið virkjaður.
Á Þingvöllum geta gestir upplifað lífið frá fyrri tíð, eins og Alþingi árið 1000, með því að skanna QR-kóða og leggst þá fortíðin yfir nútímann í farsímanum. Á næsta ári stendur til að gera gestum fært að sjá hverinn Geysi gjósa á ný með hjálp sýndarveruleika.
Við Þrístapa í Húnavatnshreppi fór fram síðasta aftakan á Íslandi árið 1830 og hefur þeirri sögu verið gefið líf með útisýningu Gagarín. Þegar gestir ganga að aftökupallinum, sem stendur í um 150 metra fjarlægð frá þjóðvegi 1, ganga þeir í gegnum söguna, allt frá aðdraganda morðanna á Illugastöðum að eftirmálum þeirra. Er þar dregin upp mynd af harmrænum örlögum Agnesar og Friðriks og saga þeirra verður nánast áþreifanleg í landslaginu.
