Sóknarhugur er í Dalamönnum

Í Búðardal er fyrirhugað að reisa atvinnuhúsnæði með allt að 150 milljóna króna stuðningi Byggðastofnunar, en viðvarandi skortur hefur verið þar í slíkum fjárfestingum sem hefur hamlað framþróun í byggðarlaginu.

Uppbyggingaráformin eru hluti af samstarfsverkefni Dalabyggðar, Byggðastofnunar og Fjárfestingafélagsins Hvamms. „Byggðastofnun og Dalabyggð hafa nú undirritað viljayfirlýsingu þess efnis að Byggðastofnun muni leggja til þetta fjármagn í verkefnið og Dalabyggð muni leggja til lóð, teikningar, gatnagerð og lagnir að lóð þar sem atvinnuhúsnæði mun rísa,“ segir Björn Bjarki Þorsteinsson, sveitarstjóri í Dalabyggð.

Fyrirmynd að öðrum sambærilegum verkefnum

Hann segir að um tilraunaverkefni sé að ræða. „Við erum að leita að samstarfsaðilum sem vilja koma inn sem fjárfestar í verkefninu, byggingaraðilum sem jafnframt hafa áhuga á því að fjárfesta í verkefninu eða kaupendum á eignarhlut í húsnæðinu.

Það er verulega ánægjulegt að fá þessa sterku aðkomu Byggða- stofnunar að þessu verkefni okkar í Dalabyggð og ég er handviss um að þetta verkefni, ef vel tekst til, verði fyrirmynd að sambærilegum verkefnum hringinn í kringum landið þar sem aðstæður eru viðlíka og hjá okkur í Dölum þar sem skortur hefur verið undanfarin ár í innviðauppbyggingu,“ segir BjörnBjarki.

Þátttaka í Brothættum byggðum

Á undanförnum misserum hefur sveitarfélagið háð harða varnar- baráttu til að sporna við mikilli fækkun íbúa sem varð á árabilinu 1998 allt fram til 2021 en á því tímabilinu fækkaði íbúum úr 833 niður í 607. Íbúafjöldi nú í Dalabyggð er um 660.

Búðardalur er eini þéttbýlis- kjarninn í sveitarfélaginu, en þar búa 38,5 prósent íbúanna. Í dreifbýlinu er stundaður öflugur landbúnaður og er sauðfjárrækt þar helsta greinin. Meira en 80 sauðfjárbú eru í sveitarfélaginu og þar eru nokkur af stærstu búum landsins.

Þátttaka í verkefni Byggðastofnunar, Brothættar byggðir, sem hófst á fyrri hluta árs 2022, hefur hleypt meira lífi í dreifbýlið, en það gengur undir heitinu DalaAuður.

Uppbygging í gangi

Að sögn Björns Bjarka er mikill sóknarhugur og metnaður í samfélaginu í Dölum. „Nú er til skoðunar, auk uppbyggingar atvinnuhúsnæðis, að koma af stað uppbyggingu húsnæðis fyrir viðbragðsaðila, slökkvilið, sjúkrabíla og lögreglu – sem eru í raun húsnæðislausir í dag – ásamt björgunarsveit, slysavarnadeild og Rauða krossinn. Þarna gætu verið áhugaverðir samnýtingarkostir og samlegðaráhrif.

Þessi verkefni eru verulega jákvæð viðbót við verkefni sem eru í gangi, en verið er að byggja ný íþróttamannvirki og nú er að fara af stað bygging íbúða sem búið er að úthluta lóðum fyrir.

Í mínum huga er það í raun mikill heiður að fá tækifæri til að koma að þessum uppbyggingarverkefnum öllum sem um ræðir sem hafa farið af stað á undanförnum misserum og eru í farvatninu.“