Sóknarfærin eru á landsbyggðinni

Þetta er í fjórða sinn sem markaðsstofurnar taka höndum saman og setja upp viðburðinn Mannamót 2017 fyrir samstarfsfyrirtæki sín.

 

Viðburðurinn verður fimmtudaginn 19. janúar milli 12 og 17 og er tilgangurinn að kynna ferðaþjónustufyrirtæki á landsbyggðinni fyrir ferðaþjónustuaðilum, ferðaskrifstofum og ferðaskipuleggjendum á höfuðborgarsvæðinu og markmiðið að vinna að dreifingu ferðamanna um landið allt og efla uppbyggingu heilsársferðaþjónustu úti á landi.

 

Tilgangurinn með viðburðinum er einnig sá að auka dreifingu ferðamanna um landið allt. Það verði gert með því að mynda og efla tengsl á milli ferðaþjónustufyrirtækja á Íslandi. 

 

Þrátt fyrir fjölgun ferðamanna til landsins á seinni árum eru enn mörg ónýtt sóknarfæri á landsbyggðinni og ferðaþjónustan þar í stakk búin að taka á móti fleiri gestum.

Að beina straumnum út á land

 

Arnheiður Jóhannsdóttir, framkvæmdastjóri Markaðsstofu Norðurlands og talskona Mannamóta, segir að tækifærin séu mörg í ferðaþjónustunni úti á landi og að hægt sé að taka á móti mun fleiri ferðamönnum en gert sé nú. „Það er óþarfi að hægja á straumi ferðamanna til landsins,“ segir hún. „Það þarf bara að beina honum lengra út á landið.“ 

 

Hún segir að þótt þróunin þokist í rétta átt sé mikil árstíðasveifla víða á landsbyggðinni og erfiðlega gangi að reka ferðaþjónustufyrirtæki utan háannatímans á sumrin. Eitt af hlutverkum Mannamóta sé að sýna fram á að fjölda vel rekinna ferðaþjónustufyrirtækja sé að finna á landsbyggðinni sem vel geti þjónustað mun fleiri viðskiptavini en nú sé gert. 

 

Tækifæri í landbúnaði 

 

Arnheiður nefnir sem dæmi landbúnaðinn sem nú hefur tækifæri til að framleiða matvæli handa vel yfir 2 milljónum manna árið 2017 til viðbótar við Íslendingana. „Tækifærin eru til staðar en það þarf að breyta áherslum eða starfsháttum til að nýta þau vel. Það er mikilvægt að við stöndum öll saman og tökum vel á móti ferðamönnum, fylgjumst með þróuninni á jákvæðan hátt og byggjum hér upp trausta atvinnugrein til lengri tíma.“