Skjóða slær Íslandsmet
Nythæsta kýr landsins árið 2023 var Skjóða frá Hnjúki í Vatnsdal. Hún skilaði 14.762 lítrum mjólkur á liðnu ári, sem eru mestu ársafurðir sem mælst hafa úr íslenskri kú.
Á Hnjúki eru Maríanna Gestsdóttir og Sigurður Rúnar Magnússon bændur. Maríanna segist ekki hafa einhlíta skýringu á þessum árangri, en Skjóða hefur fengið sama fóður og meðferð og aðrar kýr á bænum. Hún sé stór og mikill gripur og af ætt nythárra kúa.
Maríanna minnist sérstaklega á langömmu Skjóðu sem hafi mjólkað heilt ofboð fyrir fimmtán árum. Þá er móðuramma Skjóðu undan fyrsta kynbótanautinu sem Sigurður og Maríanna sendu á nautastöð.
„Ég myndi ekki segja að hún sé frek, en hún gerir það sem hún ætlar sér,“ segir Maríanna aðspurð um hvaða karakter Skjóða hafi að geyma. Þá sé hún brussa þótt Maríanna bæti við að hún sé almennt þæg. Skjóða er fimm ára og er á sínu þriðja mjaltaskeiði.
Maríanna segir hana vera heilbrigða og býst ekki við öðru en hún eigi mikið inni. Þrátt fyrir þá miklu nyt sem hún var með þá missti hún aldrei hold.
Nokkur heppni spili inn í að Skjóða hafi orðið nythæsta kýr landsins, en hún bar í kringum jólin 2022 og var því ekki í geldstöðu neinn hluta síðasta árs. Skjóða náði yfir fimmtíu lítra dagsnyt í fjóra mánuði, sem Maríanna segir óvenju langan tíma, og mætti kýrin fjórum sinnum í mjaltaþjóninn á dag þegar mest var.
Nánar er fjallað um niðurstöður skýrsluhaldsársins hjá mjólkurframleiðendum á síðum 44–45 í Bændablaðinu sem kom út í dag.
