Sjónarmiðin samrýmast ekki
Ísteka telur að Samkeppniseftirlitið hefði átt að óska eftir uppfærðum upplýsingum um starfsemi fyrirtækisins áður en stofnunin lauk athugun sinni á háttsemi Ísteka á blóðtökumarkaði.
Í bréfi sem lögmaður Ísteka sendi Samkeppniseftirlitinu kemur fram að fyrirtækið sé fullkomlega meðvitað um sterka stöðu sína á þessum markaði og hafi lagt sig fram um að haga starfsemi sinni eftir því. Samkeppniseftirlitið kvartaði meðal annars yfir ónógri upplýsingagjöf til bænda. Ísteka hafi hins vegar breytt framsetningu verðskrárinnar árið 2022 á þann hátt að bændur sjái hvernig nytjar einstakra hryssa eru.
Þá er því haldið fram í bréfi Ísteka að fyrirtækið muni fella niður án tafar ákvæði í samningum um einkasölu í þeirri mynd sem þau eru. Bændum hafi staðið til boða að hætta viðskiptum við fyrirtækið án skilyrða. Ísteka finnist þó ekki ásættanlegt að bændur hætti viðskiptum á söfnunartímabili eftir að búið er að kosta til mælinga á blóðinu.
Samkeppniseftirlitið setti út á að Ísteka sé eina fyrirtækið sem kaupi merablóð á Íslandi, en stundi samhliða því blóðtöku úr eigin hryssum í samkeppni við blóðbændur. Þar með sé fyrirtækið þátttakandi í öllum hlekkjum virðiskeðjunnar, sem mætti skilgreina sem lóðrétta samþættingu. Í bréfi Ísteka segir að til grundvallar hryssuhaldi Ísteka lægju rök um bætta búskaparhætti, en ekki samkeppnisrekstur við bændur, og sé um að ræða lítið magn miðað við heildina. Ísteka er stærsti einstaki hrossaeigandinn hérlendis.
