Sigurður í Pylsumeistaranum er Kjötmeistari Íslands

Sigurður Haraldsson í Pylsumeistaranum var krýndur Kjötmeistari Íslands í fagkeppni Meistarafélags kjötiðnaðarmanna sem haldin var á dögunum.

Sigurður varði titilinn frá síðustu keppni, en hún er haldin á tveggja ára fresti. Hann vann auk þess til verðlauna fyrir bestu vörurnar unnar úr lambakjöti, svínakjöti og fyrir bestu vöruna í flokknum kæfur og paté.

Sigurður rekur verslun sína á Laugalæk í Reykjavík sem sérhæfir sig í pylsum, en hann er þar einnig með verðlaunavörur til sölu.

Titilinn Kjötmeistari Íslands hlýtur sá kjötiðnaðarmaður sem fær flest stig samanlagt úr fimm stigahæstu vörum sínum. Vörum eru gefnar stig og fá þær gull, silfur eða brons eftir fjölda stiga. Til að fá gullverðlaun þurfa þær að vera nánast gallalausar. Sigurður hlaut 255 stig samanlagt, Steinar Þórarinsson frá Sláturfélagi Suðurlands varð annar með 251 stig og Sævar Jóhannesson frá Kjarnafæði Norðlenska og Jónas Þórólfsson frá Frávik í þriðja til fjórða sæti með 249 stig. Í fagkeppninni senda kjötiðnaðarmenn inn vörur með nafnleynd til dómarahóps sem dæmir vörurnar eftir faglegum gæðum. Hver keppandi má senda inn allt að tíu vörur til keppninnar.

Allar vörur byrja með fullt hús stiga, en dómarar leita síðan að öllum hugsanlegum göllum. Við hvern galla sem finnst fækkar stigum. Með þessu fyrirkomulagi geta margar vörur fengið gull-, silfur- eða bronsverðlaun.