Sérhæft íslenskt járningamannapróf

Í haust hófst nýtt nám við Háskólann á Hólum, sérhæft íslenskt járningamannapróf. Námið miðar að því að nemendur öðlist nauðsynlega þekkingu og færni til að uppfylla alþjóðlega gæðastaðla og prófkröfur sem gilda um starfsréttindi járningamanna. Sérstök áhersla er lögð á járningar og gangtegundir íslenska hestsins.

Vantar meiri fagþekkingu

Þótt grunnatriði í hófhirðu og járningum hafi verið kennd við skólann um áratugaskeið markar námið algjör tímamót í menntun á þessu sviði við skólann. Kristján Elvar Gíslason, járningameistari skólans, og norski járningameistarinn Aksel Vibe bera hitann og þungann af kennslunni en auk þeirra koma fleiri sérfræðingar þar að. Námið spannar eitt skólaár og skiptist í lotukennslu á Hólum og fjarnám. Öll aðstaða og búnaður til kennslunnar á Hólum er fyrsta flokks eftir gagngerar umbætur á árinu. Heimastuðningurinn við framkvæmdirnar var ómetanlegur en KS styrkti skólann myndarlega.

„Námið er einungis í boði fyrir mjög vana járningamenn sem eru að lágmarki með fimm ára reynslu, enda gerðar miklar kröfur til að standast lokapróf. Þörfin fyrir fleiri fagmenntaða járningamenn með sérþekkingu á járningum ganghestakynja er mjög skýr. Þeir sem ljúka þessu námi koma einnig til með að verða okkar samstarfsaðilar og verknámskennarar í framtíðinni fyrir verklega kennslu í grunnnámi sem er í undirbúningi. Okkur vantar almennt meiri grunnþekkingu á járningu á íslenskum hrossum, bæði hérlendis og erlendis,“ segir Kristján Elvar, en hann hefur ferðast um allan heim síðustu sautján árin að járna íslensk hross.

Mennt er máttur

Íslenskum hestum erlendis fer fjölgandi og segist Elvar finna fyrir aukinni eftirspurn eftir járningamönnum með þekkingu á að járna íslensk hross.

„Mennt er máttur, það er bara þannig. Eftir útskrift hafa nemendur faglega getu til að starfa sem sérfræðingar við járningar íslenskra hesta og standast réttindakröfur sem gerir þeim kleift að járna nánast alls staðar í heiminum en víða í Evrópu er það þannig að það er bannað að vera ólærður og járna hross. Markaðurinn er alþjóðlegur og við sjáum fyrir okkur í framtíðinni að fá bæði íslenska og erlenda nemendur í námið.“