Senn líður að hrútafundum
Gert er ráð fyrir að hrútaskráin komi úr prentun mánudaginn 17. nóvember. Að vanda verður útgáfunni fylgt eftir með kynningafundum á vegum búnaðarsambandanna víðs vegar um landið. Þótt megintilgangur fundanna sé að undirbúa jarðveginn fyrir komandi sauðfjársæðingar eru þeir jafnframt góður vettvangur til að ræða ræktunarstarfið í sauðfjárræktinni.
Hrútaskráin mun nú innihalda upplýsingar um 50 hrúta og er megnið af þeim hrútar sem ekki hafa verið áður á stöðvunum. Talsverð fjölbreytni ætti að finnast í þessum hópi. Áfram er lögð áhersla á að framrækta ARR hrútalínuna frá Þernunesi með glæsilegum lambhrútum. Sem dæmi má nefna þá eru nú yngstu afkomendur Gimsteins 21-899 sem koma á stöð komnir í fjórða ættlið frá höfðingjanum og erfðahlutdeild Gimsteins í þeim orðin 6,25%. Í skránni eru sjö hrútar arfhreinir fyrir ARR genasamsætunni og henta vel þar sem hraði innleiðingar vegur hærra heldur en að forðast of hraða skyldleikaaukningu. Tveir veturgamlir ARR hrútar koma nú inn sem valdir eru á grunni reynslu. Þá koma tveir hyrndir hrútar frá Skammadal 2 í Mýrdal sem eru fyrstu fulltrúarnir fyrir þessa nýju ARR línu sem uppgötvaðist síðastliðinn vetur. Nokkrir nýir ARR hrútar af Dalalínu verða á boðstólnum. Þá eru einnig á stöðvunum reyndir hrútar með mögulega verndandi arfgerðir sem fengu frábæra útkomu í haust, s.s. Hrókur 24-960 frá Brúnastöðum og Faldur 23-937 frá Ytri-Skógum. Spennandi litaðir hrútar eru í hópnum, s.s. Fursti 22-934 frá Sölvabakka, nýr móbíldóttur ARR hrútur, arfhreinn AHQ mórauður hrútur og ýmislegt fleira mætti nefna sem betur verður kynnt í skránni. Áfram mun atvinnuvegaráðuneytið styrkja bændur til að nota sæðingar og þannig hvetja til innleiðingar á arfgerðum sem veita vernd gegn riðuveiki.
