Nýtt verknámshús byggt á Sauðárkróki
Verknámshús Fjölbrautaskóla Norðurlands vestra (FNV) á Sauðárkróki mun stækka verulega á næstu misserum.
Þann 6. apríl síðastliðinn fór fram undirritun samnings um stækkun verknámshússins um allt að 1.400 fermetra. Sú stækkun mun gerbreyta aðstöðu til náms og kennslu og mæta mikilli fjölgun nemenda í starfs- og verknámsgreinum skólans. Kennarar og nemendur horfa með mikilli tilhlökkun til þess að taka nýtt verknámshús í notkun en ekki liggur enn fyrir hvenær framkvæmdum lýkur.
700 nemendur
Fjölbrautaskóli Norðurlands vestra var stofnaður árið 1979. Nemendur eru í dag rúmlega 700 talsins að meðtöldum fjarnemum. Við skólann starfa 68 starfsmenn.
„Rétt um helmingur nemenda kemur af Norðurlandi vestra en hinn helmingurinn kemur frá öllum landshornum. Þetta á einkanlega við um nemendur í helgarnámi, sem boðið er upp á við skólann. Til að mæta þörfum nemenda utan Sauðárkróks er boðið upp á heimavist. Á haustönn 2023 dvöldu 90 nemendur á heimavistinni,“ segir Þorkell V. Þorsteinsson, aðstoðarskólameistari FNV.
„Rúmur helmingur nemenda stundar starfstengt nám við skólann. Þar munar mikið um nemendur í helgarnámi, sem eru á annað hundrað talsins og stunda helgarnám í húsasmíði, rafvirkjun, bifvélavirkjun og kvikmyndagerð. Þetta þýðir að verknámshús skólans er nýtt alla daga vikunnar og er fyrir löngu orðið allt of lítið fyrir þá starfsemi sem þar fer fram.“
Stúdentspróf frá FNV og búfræðipróf frá LbhÍ
Við skólann er hægt, auk hefðbundins náms til stúdentsprófs, að stunda nám í húsasmíði, rafvirkjun, vélvirkjun, vélstjórn A, vélstjórn B, bifvélavirkjun og kvikmyndagerð auk náms í meistaraskóla, en það nám er í boði í gegnum fjarfundabúnað, sem þýðir að nemendur koma víða að af landinu.
Loks er boðið upp á nám í íþróttaakademíu í fótbolta og körfubolta, auk náms í hestamennsku, bæði til hestaliða- og stúdentsprófs. Þá eru FNV og Landbúnaðarháskóli Íslands í samstarfi sem miðar að því að nemendur eigi kost á brautskráningu með stúdentsprófi frá FNV og búfræðiprófi frá LbhÍ.
Auk ofangreindra iðn- og starfsnámsgreina hefur skólinn af og til boðið upp á nám í hársnyrtiiðn, slátrun, fisktækni í samvinnu við Fisktækniskóla Íslands og trefjaplastsmíði en það nám er samvinnuverkefni FNV, Samtaka iðnaðarins og Samgöngustofu.
Gott samstarf við atvinnulífið
Þorkell segir að skólinn hafi alla tíð kappkostað að eiga gott samstarf við atvinnulífið eins og sést á námsframboði skólans sem ekki falla undir hefðbundið námsframboð.
„Til marks um þessa viðleitni okkar þá er námsbraut í matvælafræði á lokametrum samþykktarferlis hjá mennta- og barnamálaráðuneytinu. Þá er skólinn í góðri samvinnu við byggingafyrirtæki sem hafa séð skólanum fyrir verkefnum í húsasmíði. Stjórnendur og starfsfólk skólans horfa því björtum augum til framtíðar og hlakka til að takast á við ný verkefni sem fram undan eru,“ segir Þorkell.
