Nýtt merki vottar gott starfsmannahald
Friðheimar eru í samstarfi við Báruna, stéttarfélag, að innleiða nýtt merki, Í lagi, sem ætlað er að votta að starfsmenn fyrirtækja hafi kjarasamninga við stéttarfélag. Merkið er að danskri fyrirmynd.
Á málþingi á degi landbúnaðarins kom fram hjá Halldóru S. Sveinsdóttur, formanni Bárunnar, stéttarfélags, að Báran hefði undanfarið unnið með garðyrkjubændum í Friðheimum að merki sem nefnist Í lagi. Þetta væri hugmynd sem kæmi frá Danmörku og lýsti því að starfsfólk á viðkomandi stað hefði kjarasamning og að hugað væri vel að því launafólki.
Unnið með bændum í Sölufélagi garðyrkjumanna
Hugmyndin að innleiðingu slíks merkis á Íslandi er upprunnin í Friðheimum í Reykholti. Knútur Rafn Ármann í Friðheimum segir verkefnið búið að vera í vinnslu um allnokkurt skeið og til standi að koma merkinu í umferð síðar í vetur. Hópur bænda innan Sölufélags garðyrkjumanna muni taka merkið upp þegar undirbúningsvinnu sé að fullu lokið, en hún felur meðal annars í sér gerð gæðahandbóka innan viðkomandi fyrirtækja.
„Merkið er hugsað sem jákvæður hvati til fyrirtækja og verkalýðsfélaga – að búa til jákvætt samtal þessara aðila með hvatningu,“ segir Knútur. Hugsunin sé að fyrirtæki geti haft vottun um að hugað sé vel að starfsfólki og það sé, ásamt fleiri þáttum, jákvætt að neytandinn geti valið sér vöru sem hafi slíka vottun, auk þess sem það styrki innlenda framleiðslu gagnvart innfluttri vöru. ASÍ hefur einnig lagt verkefninu lið.
Undirbúningi að ljúka og merkið í samþykktarferli
„Fyrirmyndin kemur frá Danmörku,“ segir Halldóra. „Það sem við erum að tala um er að fyrirtæki fær þetta merki ef það hefur kjarasamning við viðkomandi stéttarfélag. Hér erum við að þekja 90% markaðarins með kjarasamningum,“ útskýrir hún. Fyrirtækin geti þannig merkt vörur sínar með Í lagi, til glöggvunar fyrir neytendur.
„Hugmyndin er að við samþykkjum að fyrirtækin séu að fara eftir kjarasamningum og að greiða rétt laun og þá fá þau stimpilinn Í lagi. Þetta hefur verið samvinnuverkefni okkar og Friðheima eingöngu enn þá. Friðheimar eru svo að vinna í baklandi garðyrkjubænda,“ segir hún enn fremur. Undirbúningi sé nánast lokið en merkið hafi ekki verið formlega samþykkt enn sem komið er.
Danir notað OK-merki í mörg ár
Danska OK-merkið er líklega fyrirmynd Í lagi-merkisins. Það hefur verið allmörg ár í umferð og er sameiginlegt átak um 65 danskra verkalýðsfélaga. Merkið á að tryggja öryggi til mannsæmandi launa skv. kjarasamningi, orlofs og fæðingarorlofs. Um 1,3 milljónir launafólks í Danmörku munu vera undir OK-merkinu.
