Nýr verslunarstjóri í Hrísey

Ásrún Ýr Gestsdóttir tók í haust við sem verslunarstjóri Hríseyjarbúðarinnar. Henni var boðið starfið í lok sumars og ákvað að slá til eftir samráð við fjölskylduna, enda segir hún afar mikilvægt að viðhalda verslunarrekstri í eyjunni.

Hríseyjarbúðin er hlutafélag sem var stofnað árið 2015 eftir að nokkrir aðilar höfðu reynt verslunarrekstur sem gekk ekki. „Eyjan var búðarlaus um tíma, sem enginn vildi, og fóru Hríseyingar þá leið að stofna félag um reksturinn,“ segir Ásrún. Hún veit ekki hversu margir hluthafarnir eru á bak við verslunina í dag, en í upphafi voru þeir 71. „Þetta eru Hríseyingar búsettir hér, orlofshúsaeigendur og aðrir velunnarar eyjunnar – en við erum svo heppin að eiga marga svoleiðis.“

Allar helstu nauðsynjar til

„Þetta er pínu vísir að pöntunarfélagi og reynum við að koma til móts við alla svo fólk þurfi ekki alltaf að gera innkaupin í landi. Búðin er ekkert rosalega stór, en það er samt fjölbreytt úrval. Við erum með allar helstu nauðsynjar sem þú þarft fyrir heimilislífið, eins og krydd, allt í baksturinn, frystivörur eins og fisk, kjöt og kjúkling. Eins brauð, álegg og allar helstu mjólkurvörur. Þegar fólk er að koma hingað í sumarbústaðina er það ekki alltaf búið að átta sig á því að það þarf ekki að bera með sér sex Bónuspoka. Það getur komið hingað og verslað allt sem það þarf fyrir grillið, pitsugerðina og kósíkvöldið.

Þá erum við með sjálfsafgreiðslu hérna í Hríseyjarbúðinni, en fyrir utan er skúr opinn allan sólarhringinn. Þar er bæði posi og upplýsingar fyrir millifærslu. Ef þú vaknar um miðja nótt og ákveður að þig vanti eitthvað getur þú keypt snakk, ídýfu, mjólk, brauð, smjör, ost, kex og nammi. Þetta byggir á því að við treystum fólki í eyjunni til að vera heiðarlegt, sem hefur gengið eftir, en erum samt með myndavélar til öryggis.“

Þjónusta heimamenn og ferðalanga

„Sumarið heldur búðinni vel uppi yfir árið. Vetrardagarnir eru rólegri og afgreiðslutíminn styttri, á meðan yfir sumarið er opið alla daga og veltan á einum degi jafnast á við fjóra til fimm daga yfir veturinn. Við reynum fyrst og fremst að þjónusta íbúana, en treystum líka mikið á ferðamenn. Það er erfitt að reka verslanir á svona litlum stöðum og við höfum fengið styrki frá Byggðastofnun og ríkinu, bæði til rekstrar og uppbyggingar á húsnæðinu.

Með fasta búsetu í Hrísey allt árið eru 120 til 130 manns. Í vetrarfríum fjölgar umtalsvert því að helmingur íbúðarhúsnæðis hérna eru orlofshús. Það er okkur til happs hversu duglegt fólk er að dvelja í húsunum sínum. Núna í vetrarfríum fer fjöldinn í eyjunni yfir 200 manns, en yfir sumartímann fer hann yfir 300 manns.“

Ferja oft á dag

Ásrún bendir á að þar að auki sé mikið um dagsgesti. „Hrísey er svo stutt frá landi og það er svo fljótlegt að fara hingað yfir, en ferjan gengur á tveggja tíma fresti frá Árskógssandi.“ Margar gönguleiðir eru á eyjunni og yfir vetrartímann hefur ungmennafélagið útbúið gönguskíðaslóðir. „Hinn fullkomni dagur væri að koma með ferjunni hálf tíu eða hálf tólf á laugardegi. Taka síðan gönguskíðahring, koma eftir það í búðina til að borða og þaðan í heita pottinn. Svo er hægt að fara út að borða á veitingastaðnum Verbúðinni um kvöldið. Yfir vetrartímann fer síðasta ferjan klukkan níu á kvöldin frá Hrísey, en það er hægt að bóka sérstaklega ferð klukkan ellefu.“

Ferjan tekur ekki bíla, en þeir sem eru með mikinn farangur geta fengið lánaðar hjólbörur sem eru á höfninni. „Á mínu heimili eru hjólbörur sem við tökum oft með okkur niður eftir ef við vitum að við munum koma með mikið til baka úr landi og eru þær merktar okkar húsi. Svo eru Hríseyingar almennt frekar greiðviknir og góðir og er auðvelt að fá aðstoð frá þeim sem eru með bíl.

Ásrún Ýr starfar jafnframt sem þjónustu- og upplýsingafulltrúi Akureyrarbæjar með starfsstöð í Hrísey. „Yfirmenn mínir hjá Akureyrarbæ eru algjörir snillingar og vildu leyfa mér að minnka starfshlutfallið mitt hjá þeim svo ég gæti gripið þetta tækifæri að vera með búðina og sjá hvernig þetta vinnur saman.“