Nýr hlaðvarpsþáttur: Á Skörinni er rætt um landbúnaðarpólitík

Nýr þáttur, Skörin, hefur göngu sína í hlaðvarpi Bændablaðsins. Það er Freyja Þorvaldar sem ræður ríkjum á Skörinni en hún er búsett á Grímarsstöðum í Borgarfirði. Í þættinum verður rætt um landbúnaðarpólitík í víðu samhengi, hagsmuni bænda og neytenda, stefnur og strauma. Fyrsti gestur Freyju er Unnsteinn Snorri Snorrason, framkvæmdastjóri Landssamtaka sauðfjárbænda. Þau tala um framtíð sauðfjárræktarinnar og velta fyrir sér hvernig bæta má hag stéttarinnar.

„Ætlunin er að heyra í fjölbreyttum hópi viðmælenda úr ólíkum áttum. Landbúnaðarkerfið er stórt og mikið og margir hafa á því skoðun, bæði hvort að best væri að breyta því eða hvort að núverandi fyrirkomulag sé hentugast. Það verður því af nógu að taka á Skörinni,“ segir Freyja.

„Ég er úr Kópavoginum en áhugi á landbúnaði hefur fylgt mér alla tíð, framan af aðallega á hrossum. Á Grímarsstöðum bý ég ásamt Jóni Ottesen manninum mínum og dóttur okkar og þar höldum við aðallega hross en einnig rúmlega 40 kindur. Jón er alinn upp á sauðfjárbúi og því var ekki hjá því komist að setja sig inn í málin til að geta tekið þátt í fjörugum eldhúsumræðum um landbúnað eins og tíðkast til sveita.“

Freyja stundar nám í búvísindum við Landbúnaðarháskóla Íslands á Hvanneyri ásamt því að sinna hlutastarfi við markaðsrannsóknir hjá Maskínu og vinna sem markaðsstjóri hjá Furuflís, sem selur undirburð í útihús.

Skörin er aðgengileg á öllum helstu hlaðvarpsveitum og hægt er að hlusta á þáttinn hér undir.