Núpur III

Á Núpi III undir Vestur-Eyjafjöllum búa Guðmundur Guðmundsson og Berglind Hilmarsdóttir.

Býli: Núpur 3.

Staðsett í sveit: Vestur-Eyjafjöllum.

Ábúendur: Guðmundur Guðmundsson og Berglind Hilmarsdóttir ásamt erfðaprinsinum Sverri Guðmundssyni og Ástu Þorsteinsdóttur frá Fróðastöðum í Borgarfirði.

Fjölskyldustærð (og gæludýra): Ættarhöfðinginn Guðmundur og kona hans, Berglind, eiga saman þrjá krakka; Hilmar Hauk, 35 ára, Unu Björgu, 30 ára og ættarlaukinn Sverri, 28 ára.

Einnig eru á bænum hundurinn Skotta, hvolparnir Tása og Aamundsen og tveir fjósakettir sem hafa aldrei komið inn í fjós.

Stærð jarðar? Um 220 hektarar af undirlendi og tæpir 3000 ha af heiðarlöndum.

Gerð bús? Kúabú með sauðfjáráhugamál.

Fjöldi búfjár og tegundir? 60 mjólkurkýr plús uppeldi. Um 200 nautgripir í heildina, 80 ær, hrútarnir Bergur og Halldór og fimm hross.

Hvernig gengur hefðbundinn vinnudagur fyrir sig á bænum? Vaknað um hálf sjö og mjólkað, fjósið skúrað, gefið eftir þörfum og sinnt því sem þarf að sinna þess á milli, jafn misjafnt og dagarnir eru margir.

Endað á kvöldmjöltum og almennu eftirliti í hús og haga.

Skemmtilegustu/leiðinlegustu bústörfin? Allt skemmtilegt nema þegar eitthvað er bilað. En sumum finnst mjög leiðinlegt að valsa bygg.

Hvernig sjáið þið búskapinn fyrir ykkur á jörðinni eftir fimm ár? Búið að stækka gamla fjósið um helming fyrir uppeldi, byggja vélageymslu, íbúðarhús, hesthús, kjötvinnslu og endurnýja gamla Zetorinn. Gefum þessu sex ár.

Hvaða skoðun hafið þið á félagsmálum bænda? Bændur sjálfir mættu vera duglegri við að hafa áhrif á sín hagsmunasamtök.

Hvernig mun íslenskum landbúnaði vegna í framtíðinni? Vel ef fólk spáir í það hvaðan maturinn kemur.

Hvar teljið þið að helstu tækifærin séu í útflutningi íslenskra búvara? Ætli það verði ekki að vera lambakjötið og einhverjar mjólkurafurðir.

Hvað er alltaf til í ísskápnum? Egg, smjör, ostur, laukur, gulrætur og mjólk.

Hver er vinsælasti maturinn á heimilinu? Allt sem fæst úr moldinni í heimabyggð, kjöt og grænmeti.

Eftirminnilegasta atvikið við bústörfin? Þegar við fluttum kýrnar yfir í nýja fjósið í apríl 2015 og vorið 2010 þegar eldfjallið í bakgarðinum gaus.