Norðlenskir bændur verðlaunaðir
Bændur á þremur bæjum voru verðlaunaðir á aðalfundi Búnaðarsambands Eyjafjarðar á dögunum. Í ályktun fundarins er nýgerðum breytingum á búvörulögum fagnað.
Þau Agnar Þór Magnússon og Birna Tryggvadóttir Thorlacius hlutu hvatningarverðlaun BSE fyrir fádæma dugnað og myndarlega uppbyggingu á bújörðinni í Garðshorni á Þelamörk. Í umsögn segir að þau Agnar og Birna séu með óþrjótandi framkvæmdagleði, hafi bætt og breytt húsakosti jarðarinnar og vinnuaðstöðu. Í Garðshorni stunda þau hrossa- og sauðfjárrækt. Búið hefur níu sinnum verið tilnefnt sem hrossaræktunarbú ársins og hross frá bænum hlotið allmörg verðlaun. Sauðfjárræktin er enn fremur til fyrirmyndar skv. umsögn þar sem þau hafa sýnt fram á stöðugar og góðar framfarir bæði í gerð og þunga.
Sigtún hlaut nautgriparæktarverðlaun
Bændurnir á Sigtúnum í Eyjafjarðarsveit, þau Kristbjörn H. Steinarsson og Aðalbjörg Þórólfsdóttir, ásamt börnum sínum og tengdadóttur, hlutu nautgriparæktarverðlaun BSE fyrir góðan árangur og afurðasemi í mjólkurframleiðslu. Kristbjörn og fjölskylda tóku við Sigtúnum árið 2020 en bærinn hefur um langt árabil skilað góðum afurðum. Á síðasta ári var búið þriðja afurðahæsta bú Eyjafjarðar og kýrin Lísa undan Seið 14040 var þriðja nythæsta kýr héraðsins.
Sauðfjárræktarverðlaun búnaðarsambandsins í ár hlutu Atli Þór Friðriksson og Guðrún Magnúsdóttir á Koti í Svarfaðardal. Í umsögn segir að afurðir fjárins séu til fyrirmyndar, vaxtarhraði lamba með því mesta sem gerist og fallþunginn eftir því. Guðrún er frá Koti en Atli Þór frá Grund en þau tóku við rekstri föður Guðrúnar árið 2015.
Fögnuðu breytingum á búvörulögum
Aðalfundur BSE ályktaði um nýgerðar breytingar á búvörulögum. Í ályktuninni er lagabreytingunum fagnað. Í greinargerð með ályktuninni er bent á mikinn vinnslukostnað afurðastöðva í kjöti vegna smæðar markaðarins og takmarkaðrar nýtingar sauðfjársláturhúsa. Meiri hagræðing á grunni samvinnu sé mikilvægur þáttur til að lækka vinnslukostnað.
„Tollasamningar sem Ísland hefur gert við önnur ríki og ríkjabandalög, auk breytinga á fyrirkomulagi við útboð tollkvóta hefur sett mikinn þrýsting til lækkunar á afurðaverði til bænda. Við því er nauðsynlegt að bregðast með breytingum á starfsumhverfi landbúnaðarins eins og gert var með framangreindum breytingum á búvörulögum,“ segir jafnframt í greinargerð með ályktuninni.
Aðalfundurinn var haldinn í Hlíðarbæ þann 27. mars síðastliðinn.
