Nægt gistirými í Skagafirði

Tæpir fjórir mánuðir eru nú í að Landsmót hestamanna hefjist á Hólum í Hjaltadal.  Undirbúningur gengur mjög vel, tæplega 3.500 miðar eru þegar seldir á mótið og sala á tjaldstæðum með rafmagni fer vel af stað. 

 

Einn mikilvægur þáttur í skipulagi stór viðburðar er fyrirkomulag á gistingu og ferðamöguleikum til og frá mótsstað.  Ferðaskrifstofan Northwest Adventures í Skagafirði annast utanumhald á öllu sem viðkemur gistingu og ferðum.  Stefnt er að því að rútuferðir verði í boði innan Skagafjarðar á meðan á mótinu stendur og dagsferðir verða í boði frá Reykjavík.  Þá hyggja margir mótsgestir á hestaferð ýmist fyrir eða eftir Landsmót.  Anna Lilja Pétursdóttir framkvæmdastjóri Northwest Adventures segir á landsmótsvefnum að mjög vel hafi gengið að koma fólki í gistingu og staðan núna sé sú að nægt gistirými sé í boði í Skagafirði á meðan á Landsmóti stendur.