Mr. Iceland heiðraður
Ferðaþjónustubóndinn og hvítlauksræktandinn Hörður Bender á Efri-Úlfsstöðum í Landeyjum var á dögunum útnefndur Sproti ársins 2022 á aðalfundi Markaðsstofu Suðurlands.
„Auðvitað er jákvætt að fá viðurkenningu og gaman að fá hvatningu frá greininni. Það er gaman að ferðaiðnaðurinn taki svona vel á móti nýjum aðilum í greininni,“ segir Hörður.
Á Njáluslóðum
Starfsemi Harðar og fjölskyldu hans gengur undir nafninu Mr. Iceland. „Mr. Iceland býður upp á hestatengdar menningarferðir þar sem erlendir ferðamenn koma og fá reiðkennslu, hestaferð og íslenska máltíð í hesthúsinu. Þar sem við erum á Njáluslóð segi ég frá nágrönnum mínum, Njáli og Gunnari, og til að gera reynsluna skemmtilegri klæðum við okkur öll í skikkjur áður en við ríðum af stað. Ferðirnar hafa notið mikilla vinsælda og valdi tímaritið Vanity Fair okkur sem bestu ferðamannaupplifun á Íslandi,“ segir Hörður.
Hvítlaukurinn í hagli og roki
Hörður ræktar líka hvítlauk en vorið reyndist honum erfitt.
„Við erum enn í hvítlauksbaráttunni og settum niður hvítlauk í fyrrahaust sem er kominn upp núna. Vorið í ár var hins vegar ekki til að hjálpa og þegar ég stóð úti í akri og horfði á hvítlaukinn barinn niður af hagli og roki varð ég enn staðfastari í því að ef við ætlum vera betri að rækta grænmeti þá verðum við að byggja upp betri aðstæður með skjóli,“ segir Hörður hlæjandi.
Gulrætur og lífræn ræktun
Það er meira en nóg að gera á Efri Úlfsstöðum við alls konar ræktun.
„Við erum að klára núna að gróðursetja sex þúsund tré í skjólbelti ásamt því að hefja okkar lífrænu ræktun á gulrótum.
Við höfum tekið frá um það bil 20 hektara af ökrum sem verða lífrænt svæði. Í ár setjum við niður í 5 hektara og hvílum hina akrana en það er svokölluð skiptiræktun,“ segir Hörður.
