Mjólkurpóstur á Laugavegi
Mjólkurpóstur á Laugavegi í Reykjavík er myndin titluð og er frá árinu 1949. Þjónusta mjólkurpósta var alltíð hér á árum áður og segja sögur að drengir allt niður í níu ára gamlir hafi haft þann starfa. Á síðu Þjóðminjasafnsins birtast frásagnir nokkurra sem gegndu þessu hlutverki og segir einn frá því að hafa byrjað hvern morgun á að mjólka kýrnar, fylla mjólkina á glerflöskur, setja þær í ullarsokka og á klifbera á hesti. Teyma svo hestinn 5 km leið, útbýta flöskum á heimili og safna saman þeim flöskum sem tómar voru. Þetta var ærinn starfi enda gátu dagarnir verið langir.
Í heftinu Friðarboðinn og vinarkveðjur frá árinu 1941 kemur fram í bréfi Júlíusar Zoëga skálds frá Svalbarða til vinar síns, Jóhanesar Kr. Jóhannessonar skálds, trésmiðs og útgefanda fyrrnefnds tímarits að nóbelsverðlaunaskáldið okkar, Halldór Laxness, hafi nú einmitt gegnt starfi mjólkurpósts. Ekki lætur Júlíus vel af Halldóri og segir ma. „Meðal íslenskra rithöfunda virðist það nú vera í tísku, að vekja upp slíka dáindisdrauga og láta þá ganga aftur í kjólfötum 20. aldarinnar. Upphafsmaður þessarar óþjóðlegu og ókristilegu iðju er heiðinginn Halldór Kiljan Laxness, fyrverandi mjólkurpóstur ...“ Mjólkurfernurnar sem við þekkjum í dag voru svo teknar í gagnið upp úr miðri 20. öld.
