Mikil söluaukning á eggjum

Fyrir fimm árum, í jólablaði Bændablaðsins árið 2013, var sagt frá gríðarlegri söluaukningu á íslenskum eggjum. Rætt var við Þorsteinn Sigmundsson eggja- og kjúklingabónda í Elliðahvammi og formann eggjabænda sem sagði að desembermánuður hefði slegið öll met – þrátt fyrir að hann væri varla hálfnaður. Hann sagði að lífsstílsbreytingar og fjölgun ferðamanna á Íslandi skýri söluaukninguna.

„Það fór að bera á því fyrir svona tveimur til þremur árum að sala á eggjum fór að aukast. Svo fyrir um ári varð veruleg aukning og við höfum nú tengt þetta við tiltekna lífsstíla í mataræði sem hafa rutt sér til rúms á undanförnum árum, þar sem áhersla er lögð á að hafa lítið af einföldum kolvetnum í fæðunni. Þannig að yngra fólk er aftur orðið að virkum neytendum eggja.

Eggin hafa á undanförnum árum endurheimt stöðu sína sem heilsufæði, enda eru þau algjörlega náttúruleg afurð – fullkomlega innsigluð af hænunni – og hágæðafæða. Það er til dæmis ekki talað lengur um eggjarauðuna sem sérstaklega varasama. Við tengjum þessa söluaukningu líka við fjölgun ferðamanna til Íslands. Desember er til að mynda ekki lengur sölumesti mánuðurinn. Núna eru það mánuðirnir frá júní og fram í september sem langmest sala er í. Raunar er aukningin svo mikil að eggjabændur hafa þurft að skipuleggja búskap sinn upp á nýtt – og vera með hámarksframleiðslu um sumarið – hreinlega til að anna eftirspurninni,“ sagði Þorsteinn í viðtali við Bændablaðið 12. desember 2013.

Nálgast má eldri árganga Bændablaðsins í gegnum vefinn timarit.is.