Matvælastofnun kærir hótanir til lögreglu
Matvælastofnun hefur sent kæru til lögreglu vegna hótana um ofbeldi í garð starfsmanna sinna. Í tilkynningu á vef stofnunarinnar segir að kæran beinist gegn einstaklingi. Kæran taki einnig til meintrar háttsemi þar sem búnaður var tekinn ófrjálsri hendi, hvatt var til refsiverðra verka og tilboði um greiðslur til starfsmanna fyrir athafnir í þágu viðkomandi. Þetta sé í fyrsta sinn sem stofnunin kærir einstakling vegna slíks.
Í lok apríl sendi Matvælastofnun frá sér tilkynningu þar sem bent var á að óvenju mikið væri um hótanir í garð starfsmanna stofnunarinnar. Dæmi séu til að starfsfólk og aðstandendur þess séu nafngreind á samfélagsmiðlum og því sendar hótanir. Hafi þetta leitt til þess að starfsmenn óttist um öryggi sitt og fjölskyldu sinnar í starfi og heima fyrir.
Matvælastofnun sinnir eftirliti með dýravelferð. Undir það fellur eftirlit með landbúnaði, matvælaframleiðslu og gæludýrahaldi. Hrönn Ólína Jörundsdóttir, forstjóri MAST, sagði í samtali við Bændablaðið að oft kalli heimsóknir frá starfsfólki stofnunarinnar fram sterk viðbrögð, reiði, ótta eða varnaviðbrögð. Í einstaka tilvikum fari viðbrögðin yfir mörkin. MAST hafi sett sér skýrt og fastmótað verklag þegar starfsfólk upplifi ógnandi hegðun.
Matvælastofnun leggi ríka áherslu á að allt ofbeldi eða hótanir um ofbeldi í garð starfsmanna stofnunarinnar sé með öllu óásættanleg og verða ávallt kærð til lögreglu.
Samkvæmt 106. gr. almennra hegningarlaga er refsivert að beita opinbera starfsmenn ofbeldi eða hótunum um ofbeldi við störf þeirra, eða reyna að hindra framkvæmd slíkra starfa. Slík brot geta varðað allt að sex ára fangelsi, en beita má sektum ef brot teljast smávægileg.
