Lokahnykkurinn á ljósleiðaravæðingu
Stjórnvöld hafa tilkynnt áform um að ljúka ljósleiðaravæðingu landsins fyrir árslok 2026. Bæta á fjarskiptasamband á 100 stöðum á landinu.
Stefnt er að því að öll heimili á Íslandi verði orðin ljósleiðaratengd árið 2026. Tengja á 102 smærri þéttbýliskjarna um land allt. Kostnaður er áætlaður um 450 milljónir króna og mun þegar vera fjármagnaður af fjarskiptasjóði og úr byggðaáætlun.
Fjarskiptastofa kannaði í vor áform fjarskiptafyrirtækja og opinberra aðila um uppbyggingu á ljósleiðara í öllu þéttbýli árin 2024–2026. Með þéttbýli er átt við 102 skilgreinda þéttbýlisstaði með 200+ íbúa og byggðakjarna með 50–199 íbúa. Niðurstaðan er sú að tilkynnt áform ná ekki til um 4.900 ótengdra heimilisfanga í þéttbýli með rúmlega 5.600 lögheimilum.
Langþráð uppfærsla
Um er að ræða framhald af verkefninu Ísland ljóstengt sem hafði að markmiði að koma ljósleiðaratengingu í dreifbýli þar sem markaðsforsendur væru ekki fyrir hendi. Fjarskiptasjóður studdi þar 57 sveitarfélög til að leggja ljósleiðaranet í dreifbýli sínu ogernúsvokomiðaðum82% lögheimila í dreifbýli hafa aðgang að ljósleiðara. Nú verður lögð áhersla á að 100% aðgengi náist fyrir árslok 2026, á grundvelli samvinnu íbúa, sveitarfélaga, fjarskiptafyrirtækja og ríkisins, eins og segir í frétt frá Stjórnarráðinu. Um sé að ræða langþráða heildstæða uppfærslu fjarskipta gagnvart þúsundum heimila um land allt.
Til stendur að gera sveitarfélögum tilboð um 80.000 kr. styrk til að kosta jarðvinnu við að tengja hvert ótengt heimilisfang fyrir árslok 2026. Sú upphæð jafngildir áætluðum meðaltals-jarðvinnukostnaði fyrir hvert heimilisfang og er jafnframt sambærileg upphæð og fjarskiptafyrirtæki setja upp sem tengigjald fyrir lögheimili í þéttbýli á markaðsforsendum. Sveitarfélög hafa til 16. ágúst að tilkynna hvort þau þiggja tilboðið.
Upphersla á farneti
Jafnframt verður ráðist í átak til að bæta fjarskiptasamband á um 100 stöðum á landinu. Útbreiðsla farnets síðustu árin hefur verið að mælast um og yfir 99,9% í byggð en samkvæmt frumathugun Fjarskiptastofu eru um 100 lögheimili eða vinnustaðir sem ekki eiga kost á farneti yfir höfuð eða þá að fyrirliggjandi farnet uppfyllir ekki lágmarksskilyrði alþjónustu.
