Lífræni dagurinn 2024

Nú er lífræni dagurinn nýliðinn, en 21. september síðastliðinn var hann haldinn hátíðlegur í þriðja skipti á Íslandi.

Tilgangur hátíðarhaldanna er fyrst og fremst að vekja athygli á lífrænni ræktun og framleiðslu á Íslandi, færa lífræna framleiðendur nær neytendum og minna á mikilvægi lífrænnar hugsunar og hugsjónar. Í ár var einnig sérstaklega við hæfi að minna á stöðu lífræna geirans á Íslandi í samanburði við nágrannalönd okkar,
þar sem stjórnvöld hafa nýlega birt aðgerðaáætlun til eflingar lífrænnar framleiðslu á Íslandi. Við erum því miður að mörgu leyti eftirbátar annarra landa þegar kemur að hlutfalli lífræns vottaðs landbúnaðarlands, fjölda framleiðenda og magni framleiðslu. Reynsla annarra landa hefur sýnt að stuðningur stjórnvalda í verki er mikilvægur þáttur til að hraða vexti greinarinnar og því áríðandi að birtingu áætlunarinnar verði fylgt eftir, markmið hennar fjármögnuð og framkvæmd.

Efling lífrænnar matvæla­framleiðslu er mikilvægur liður í því að tryggja framleiðslu hreinna matvæla í sátt við náttúru og neytendur og því í senn umhverfis­ og lýðheilsumál. Hringrásarhugsun er allsráðandi og einmitt þess vegna er ég þess fullviss að svarið við mörgum vandamálum nútímans er að finna í lífrænni hugsjón. Í lífrænni framtíð búa heilbrigð vistkerfi, frjósamur jarðvegur, lífbreytileiki, hreint vatn og andrúmsloft.

Fjölbreytni er fljót að koma upp í hugann þegar litið er yfir lífræna íslenska framleiðslu. Á lífræna deginum í ár var haldinn viðburður á veitingastaðnum Á Bístró í Elliðaárdal. Gestir gátu keypt sér veitingar úr lífrænum hráefnum, keypt vörur af lífrænum framleiðendum, hlýtt á fræðsluerindi og síðast en ekki síst átt samtal um lífræna ræktun og framleiðslu við hagsmunaaðila, áhugafólk og aðra hlutaðeigandi. Á staðnum var einnig uppstilling á afurðum sem sýndi ljóslifandi breidd lífrænt vottaðrar íslenskrar
framleiðslu, fjölbreytni hennar og hugvit og framtakssemi framleiðenda.

Þrjú lífræn býli voru með opið hjá sér þennan dag og þar gafst gestum færi á að kynna sér lífræna ræktun og framleiðslu frá fyrstu hendi og kaupa lífrænt vottaðar vörur á framleiðslustað. Þetta eru býlin Yrkja, sem staðsett er í Syðra­Holti í Svarfaðardal, Sólbakki garðyrkjustöð á Ósi í Hörgársveit og Móðir Jörð í Vallanesi á Fljótsdalshéraði. Viðburðir í tilefni dagsins voru því vel dreifðir um landið.

Skipulagning lífræna dagsins er í höndum verkefnisstjóra hjá Lífrænu Íslandi, en verkefnið Lífrænt Ísland er liður í samstarfssamningi sem VOR, Bændasamtök Íslands og matvælaráðuneytið hafa gert með sér og hefur þann tilgang að auka lífræna framleiðslu á Íslandi. Á meðal aðgerða í áætlun stjórnvalda er einmitt að styðja við verkefnið Lífrænt Ísland, sjá til þess að því verði viðhaldið og að haldinn verði lífrænn dagur árlega.

Lífræni dagurinn er því í senn mikilvæg og skemmtileg hefð sem komin er til að vera.

Að lokum langar mig að þakka öllum sem tóku þátt í lífræna deginum 2024 með einum eða öðrum hætti og óska okkur öllum til hamingju, megi hann verða enn veglegri að ári.