Landgreiðslur – hvað er það?
Höfundur: Sigurður Jarlsson, jarðræktarráðunautur hjá RML
Samkvæmt nýjum rammasamningi milli sjávarútvegs- og landbúnaðarráðherra og fjármála- og efnahagsráðherra fyrir hönd ríkissjóðs og Bændasamtaka Íslands, samþykktum þann 19. feb. 2016 er meðal annars fjallað um landgreiðslur sem Matvælastofnun á að ráðstafa.
Í rammasamningi segir: „Landgreiðslur skulu greiddar út á allt ræktað land sem er uppskorið til fóðuröflunar. Ekki er greitt út á land sem eingöngu er nýtt til beitar. Skilyrði fyrir greiðslum er að til sé viðurkennt túnkort fyrir spildur sem sótt er um framlög fyrir og spildurnar séu uppskornar á því ári þegar framlag er greitt enda liggi fyrir uppskeruskráning.“
Í reglugerð nr. 1240/2016 um almennan stuðning við landbúnað er nánar kveðið á um landgreiðslur. Þar kemur m.a. fram að fullnægjandi skil á skýrsluhaldi verði að vera til staðar til að njóta jarðræktarstyrkja og landgreiðslna. Kröfurnar eru m.a. eftirfarandi:
- Nafn og/eða númer spildu,
- Hnitsetning spildu (stafrænt túnkort)
- Ræktun, þ.e. gras, grænfóður, korn, olíujurtir eða útiræktað grænmeti
- Tegund og yrki þegar sótt er um jarðræktarstyrk
- Stærð spildu
- Ræktunarár, ef ræktað síðstliðin 5 ár
- Heildaruppskera í kg þurrefnis fyrir hverja spildu
- Heildaruppskeru í kg í útiræktuðu grænmeti.
Erfitt er að áætla hverja greiðslu enda taka framlög á hvern hektara mið af heildarfjölda þeirra hektara sem sótt er um stuðning fyrir á landsvísu. Reikna má með að í upphafi verði greiðslur hærri þar sem hluti bænda verði ekki tilbúinn að uppfylla öll ofangreind skilyrði.
Nefndar hafa verið tölur frá 3.000 kr/ha og upp undir 8.000 kr/ha á þessu ári, sem tekur þá mið af að sótt verði um landgreiðslur vegna 31 þúsund til 82 þúsund hektara. Þessar tölur eru fyrst og fremst vangaveltur og verður reynslan að skera úr um lokatöluna. Það er þó ljóst að eftir nokkru er að slægjast.
Námskeið í Jörð.is
Ráðgjafarmiðstöð landbúnaðarins í samstarfi við Landbúnaðarháskóla Íslands bjóða upp á námskeið í Jörð.is þar sem markmiðið verður fyrst og fremst að kenna bændum hvernig þeir uppfylla skilyrði fyrir landgreiðslum og ræktunarstyrkjum.
