Kvótinn fullnýttur þetta haustið
Hreindýraveiðitímabilinu er lokið. Veiða mátti 665 hreindýr í ár, 400 tveggja vetra og eldri tarfa og 265 kýr.
Jóhann G. Gunnarsson, sérfræðingur á Stjórnunar- og verndarsviði Náttúruverndarstofnunar, segir að veiðar hafi gengið vel á tímabilinu. „Veður var með eindæmum gott til 20. ágúst en eftir það til loka veiðitímans 20. september skiptust á skin og skúrir. Þá var þokusælt á mörgum svæðum og miklar rigningar. Dýrin voru undantekningarlítið vel á sig komin og væn,“ segir hann.
Tuttugu dýr í nóvemberveiði
Náðist að fella öll dýr sem fella átti nú í haust utan eins kýrleyfis á veiðisvæði 7, sá veiðimaður skilaði sér ekki til veiða né skilaði inn sínu leyfi til endurúthlutunar. Að sögn Jóhanns voru 20 leyfi fyrir kýr sem veiða má á veiðisvæði 9 á Mýrum og Suðursveit gefin út sem nóvemberleyfi og þau ber að veiða á tímabilinu frá 1. til 20 . nóvember.
„Nýútskrifaðir leiðsögumenn fóru nokkrar veiðiferðir með sína veiðimenn á þessu tímabili og gekk þeim yfirleitt vel,“ segir Jóhann enn fremur.
Varfærni í veiðikvóta
Náttúrustofa Austurlands lagði til að veiðikvóti ársins 2025 væri 665 hreindýr; 265 kýr og 400 tarfar sem var 131 dýri færra en í fyrra. Skv. ársskýrslu NA frá í fyrra var miðað við að fjöldi dýra fyrir burð 2025 yrði um 3.300 dýr og veiðiálag yrði lágt, eða um 20%, vegna óvissu um breytingu á útbreiðslu dýra, skekktra kynjahlutfalla og nýliðunarbrests á ákveðnum svæðum. Ef miðað hefði verið við forsendur fyrri ára um 25-27% veiðiálag hefði kvótinn átt að vera 825 dýr. Eins og fyrr var lagt til að kálfar og veturgamlir tarfar yrðu friðaðir. Varfærni í tillögum um kvóta ársins kom m.a. til vegna þeirrar óvissu sem að skapast hefur um fjölda dýra og breytta hagagöngu undanfarin ár.
