Kvöldstund af dulúð og harmi
"Kvöldstund full af dulúð og harmi" er yfirskrift tónleika Kanadamannsins Stephen Jenkinsons, sem heldur þrenna tónleika á Íslandi ásamt hljómsveit, í Iðnó miðvikudaginn 17. júlí, Norðurfirði föstudaginn 19. júlí og Aratungu mánudaginn 22. júlí. Allir tónleikarnir hefjast klukkan 20. Jenkinson, sem er 65 ára, er allt í senn rithöfundur, bóndi, kennari, sagnamaður og tónlistarmaður. Hann hefur að undanförnu ferðast um veröld víða ásamt hljómsveit sinni, m.a. um Norður-Ameríku, Ástralíu, Tasmaníu og Evrópu.
Umföðmum dauðann
Jenkinson var í tvo áratugi líknarráðgjafi deyjandi fólks, og er höfundur bókarinnar ,,Die Wise: A Manifesto for Sanity and Soul" en alls hefur hann gefið út fjórar bækur með hugleiðingum sínum, sem vakið hafa mikla athygli. Þá var gerð um hann heimildarmyndin ,,Griefwalker" þar sem boðskapurinn er sá að við eigum að umfaðma dauðann í stað þess að óttast hann.
Sögur og tónlist
Á tónleikunum fléttar Stephen Jenkinson saman tónum og sagnalist, segir kynngimagnaðar sögur, og vísar jafnt til sögu Íslendinga sem ósamþykktrar sögu Norður-Ameríku og spyr spurninga á borð við: Hvað hefur komið fyrir okkur? Hvernig kom það til að við gleymdum, hver nærir okkur og hver er ábyrgð okkar í heiminum? En hann minnir okkur að það hægt að hlæja líka, þrátt fyrir allt.
Elín Agla Briem, þjóðmenningarbóndi í Árneshreppi, skipuleggur tónleikaröð Jenkinsons og félaga á Íslandi, en þetta er í þriðja skipti sem hann kemur til Íslands. Hann hefur í tvígang haldið námskeið í Árneshreppi sem hafa laðað að fólk víðsvegar úr heiminum.
