Kúabændur vilja aukinn þunga í ímyndarmálum og kynningu á starfsgreininni

Margrét Gísladóttir framkvæmdastjóri Landssambands kúabænda fjallaði m.a. um kynningarmál og samfélagsmiðlaherferð sambandsins á aðalfundi LK á Akureyri á dögunum. 

 

Hún hóf störf hjá LK á liðnu ári og kom úr heimi ímyndar- og kynningarmála og varð strax ljóst að kúabændur vildu sjá aukinn þunga lagðan á ímyndarmál og kynningu í starfsgreininni.

 

„Í því þótti mér felast ótal tækifæri og stend föst á því. Þó umræðan í kringum búvörusamninga hafi verið ansi hörð á köflum færði hún okkur það að almenningur hefur opnað eyrun og hugann fyrir frakari umræðu um landbúnað,“ sagði Margrét.

 

Sýnileg á samfélagsmiðlum

 

Landssamband kúabænda hefur sótt fram á ýmsum miðlum, t.d. var opnaður reikningur á Twitter undir notendanafninu @isl_kyr, eða Íslenska kýrin. Þá hafa framkvæmdastjóri og formaður LK tekið að sér snapchat reikningana @ungurbondi og @reyndurbondi í þeim tilgangi að gera störf samtakanna sýnilegri auk þess að miðla fræðslu um nautgriparækt á Íslandi á nýstárlegan og aðgengilegan hátt. Þá eru samtökin einnig með síðu á Facebook sem m.a. er notuð til að deila fréttaumfjöllun um allt sem snýr að kúabúskap, starfsemi samtakanna og til að koma skilaboðum á framfæri til bænda.

 

Ferill mjólkurvara frá haga í maga

 

Að auki hefur markvisst verið unnið að því að koma forsvarsmönnum LK að í umræðunni þegar kemur að mjólkurframleiðslu, starfsumhverfi kúabænda og eða öðru er greininni viðkemur. Greinaskrif, opinber viðbrögð og viðtöl vegna ýmissa mála hafa markvisst færst í aukana á liðnu ári og stefnan að sögn Margrétar að halda þeirri þróun áfram. 

 

Greindi hún á aðalfundinum frá því að í undirbúningi væri samfélagsmiðlaherferð á vegum LK og stefnt að því að hefja hana á næstu vikum. 

 

„Verkefnið gengur út á fræðslu um starfsumhverfi kúabænda og feril mjólkurvara úr haga í maga,“ sagði hún. Efnið verður einungis ætlað til dreifingar á vefnum og aðgengilegt á heimasíðu samtakanna. Fengist hefur vilyrði fyrir því að nýta mjólkurfernur MS í kynningarskyni, sem hún sagði einn besta kynningarvettvang sem færi gæfist á.