Króatísk léttvín í talsverðum metum

Dalmatíusvæðið í Króatíu er þekkt fyrir öfluga vínrækt og góð víngerðarhús. Víngerð í sunnanverðri Evrópu stendur þó frammi fyrir áskorunum.

Baraka-vínekran (Vinarija Baraka) er eitt af vinsælli vínhúsunum í Króatíu. Hún er staðsett í suðurhluta landsins, nánar tiltekið á Dalmatíusvæðinu sem þekkt er fyrir víngerð og framleiðslu á vönduðum hvítum og rauðum vínum. Baraka-vínekran er fremur lítið fjölskyldufyrirtæki sem til var stofnað seint á níunda áratugnum og framleiðir vín úr hefðbundnum króatískum þrúgum, og þar er áhersla á náttúruvernd og sjálfbæra framleiðslu.

Vínviðarræktin er nálægt ströndinni þar sem jarðvegur þykir framúrskarandi góður, m.a. vegna ríkulegs kalksteins og vínviðurinn dafnar vel í hæfilegum raka sjávarloftsins. Þarna er heitt, sólríkt og á köflum mjög rakt og því kjörskilyrði fyrir vínviðinn. Ræktað er á um 6 ha lands og vínviðarplönturnar um 25 þúsund talsins. Löng hefð er fyrir vínrækt og vínbúskap í Dalmatíuhéraði.

Náð alþjóðlegum árangri

Búið ræktar fjölbreytt úrval af bæði staðbundnum og alþjóðlegum þrúgutegundum, þar á meðal hinar virtu Babić, Plavina, Debit, Maraština, Syrah, Merlot og Cabernet Sauvignon. Að auki státar víngerðin af 360 ólífutrjám og ýmsum Miðjarðarhafsplöntum, sem eykur fegurð víngarðanna. Ásamt rauðvíni og hvítvíni framleiðir Baraka mjög vinsælt og fíngert rósavín.

Baraka-fólk leggur metnað sinn í að umgangast náttúruna af virðingu. Því er notast við sjálfbærar ræktunaraðferðir án hefðbundinna efna- og áburðarmeðferða. Þannig verða ekki aðeins vínin vönduð og ómenguð heldur næst að vernda náttúruna umhverfis vínekruna.

Vínin eru unnin með bæði hefðbundnum og nútímalegum aðferðum, þar sem áhersla er lögð á að bæta bragðið og koma í veg fyrir mengun.

Vínin frá Baraka hafa náð nokkrum vinsældum á alþjóðlegum markaði, einkum í Evrópu og Norður-Ameríku, og unnið til gæðaverðlauna í vínsamkeppnum.

Eitthvað svolítið hefur fengist af króatískum vínum á Íslandi og má m.a. sjá á vef Vínbúðanna að þar fæst Kraljevski hvítvín og rauðvín, og í sérpöntun Dgac Vicelic rauðvín.

Regluverk hindrar aðlögun

Vínrækt í Evrópu á nokkuð undir högg að sækja um þessar mundir vegna loftslagsbreytinga, ekki síst í sunnanverðri álfunni, svo sem í Frakklandi, á Ítalíu og Spáni. Í nýrri alþjóðlegri rannsókn sem birtist á dögunum í PLOS Climatetímaritinu kemur m.a. fram að hærri meðalhiti og ofsafengnar hitabylgjur hafi áhrif á þroska þrúgna vínviðarins og valdi það minna sýrustigi en hærra sykurinnihaldi. Sömuleiðis eru sjáanleg áhrif á uppskerutíma og bragðgæði. Vínbændur standi þannig frammi fyrir því að leita nýrra þrúgutegunda sem eru þolnari fyrir hita og þurrkum og sömuleiðis að aðlaga áveitu og uppskeruaðferðir.

Strangir staðlar eru um vernduð upprunamerki í Evrópu og kveða m.a. á um tilteknar tegundir þrúgna og ræktunaraðferðir (GI). Þetta getur valdið vandræðum með tilliti til aðlögunar að breyttu loftslagi og hvetja skýrsluhöfundar til að regluverkið verði rýmkað í átt til aukins sveigjanleika og nýsköpunar í greininni.