Kornþurrkstöð við Húsavík
Búnaðarsamband Suður-Þingeyinga fyrirhugar að reisa kornþurrkstöð rétt hjá Húsavík nú á útmánuðum.
Að sögn stjórnarmanna í búnaðarsambandinu er komin lóð undir verkefnið, samningaviðræður við Orkuveitu Húsavíkur um kaup á 120 gráðu heitu vatni eru langt komnar og annar undirbúningur á lokametrunum. Stöðin mun byggja á umhverfisvænni tækni og verður eingöngu knúin heitu vatni.
Í skriflegu svari frá stjórn búnaðarsambandsins við fyrirspurn um verkefnið segir að unnið sé að því um þessar mundir að fá fjárfesta að verkefninu og helst sé vilji til þess að þeir komi af svæði búnaðarsambandsins. „Við vitum að það er mikil eftirspurn eftir stöð á svæðinu og hún mun ganga á fullum afköstum. Nú þegar vitum við af flöskuhálsum, bæði í Þingeyjarsýslum og Eyjafirði, sem þessi þurrkstöð getur leyst úr,“ segir í svarinu frá stjórninni. Gert er ráð fyrir að afkastageta fyrsta áfanga yrði allt að 1.500 tonn á ári, sem er sú stærðargráða sem mælt var með að lágmarki í skýrslunni Bleikir akrar, aðgerðaráætlun um aukna kornrækt. Segja stjórnarmenn að nóg sé til af varmaorku til að margfalda þessa þurrkgetu í náinni framtíð.
„Kornþurrkunin er hugsuð sem fyrsti áfanginn í uppbyggingu á alhliða þurrkstöð sem nýtir glatvarma frá Hveravöllum í Reykjahverfi og hráefni úr héraði í fjölbreytta framleiðslu á ársgrundvelli. Þar eru graskögglar, blandaðir til dæmis byggi eða öðrum fóðurhráefnum, ein helsta afurðin.
Auk þess eru áætlanir um þurrkun á hálmi, viðarkurli, sjávargróðri og sveppum svo nokkur dæmi séu tekin. Áburðarframleiðsla er einnig spennandi kostur,“ segja stjórnarmenn að lokum.
