Kornsá
Þórunn og Birgir hófu búskap á jörðinni í kringum 1980 í samstarfi við foreldra Birgis. Um 1990 tóku þau alveg við búrekstrinum.
Býli: Kornsá.
Staðsett í sveit: Fegurstu og veðursælustu sveit landsins, Vatnsdal, A-Hún.
Ábúendur: Birgir Gestsson og Þórunn Ragnarsdóttir.
Fjölskyldustærð (og gæludýra):
Við eigum fjögur börn. Svanhildur, Ármann Óli og Kristín eru flutt að heiman en Harpa, sú yngsta, er við nám á Hvanneyri. Tengdabörnin eru þrjú og barnabörnin fjögur.
Stærð jarðar? Um 650 ha.
Gerð bús? Sauðfjárbú.
Fjöldi búfjár og tegundir? 560 vetrarfóðrað fé, 27 hross og hundurinn Pera.
Hvernig gengur hefðbundinn vinnudagur fyrir sig á bænum?
Þórunn vinnur á Leikskólanum Vallabóli á Húnavöllum. Birgir sinnir hefðbundnum bústörfum eftir árstímum auk þess að keyra sláturfé á haustin.
Skemmtilegustu/leiðinlegustu bústörfin? Heyskapurinn er alltaf skemmtilegur en viðhald á girðingum aldrei skemmtilegt.
Hvernig sjáið þið búskapinn fyrir ykkur á jörðinni eftir fimm ár? Líklega verður hann með svipuðu sniði, fénu gæti fjölgað. Kannski verða fleiri aðilar komnir í búreksturinn.
Hvaða skoðun hafið þið á félagsmálum bænda? Við höldum að þeir sem sinna þeim málum vinni eftir sinni bestu sannfæringu. Við erum ekki endilega alltaf sammála forystunni.
Hvernig mun íslenskum landbúnaði vegna í framtíðinni? Vonandi vel en til þess þarf afurðaverð til bænda að hækka.
Hvar teljið þið að helstu tækifærin séu í útflutningi íslenskra búvara? Eins og er teljum við það vera í skyri og lambakjöti.
Hvað er alltaf til í ísskápnum? Mjólk, ostur og smjör, ásamt ýmsu öðru.
Hver er vinsælasti maturinn á heimilinu? Grillað lambalæri.
Eftirminnilegasta atvikið við bústörfin? Það er okkur eftirminnilegt þegar við keyptum 380 lömb eftir riðuniðurskurð og settum í ný fjárhús haustið 1992.
