Klístrað plöntuvarnarefni

Vonir eru bundnar við þróun klísturs úr ætri olíu til að verja nytjaplöntur gegn óværu í staðinn fyrir kemísk varnarefni.

Klístrinu er hægt að sprauta með sama búnaði og notaður er til að dreifa fljótandi áburði. Með því að oxa olíu sem notuð er í matvælaiðnaði með sérstökum aðferðum er hægt að gefa henni jafnmikla viðloðunareiginleika og límband. Við úðun myndar klístrið litla dropa á plöntunum sem eru smáum skordýrum ofviða en hafa ekki neikvæð áhrif á býflugur sem dreifa frjói eða önnur stærri skordýr sem éta minni óværu. Frá þessu er grein á vef The Guardian.

Innblásturinn að þessari lausn mun vera kominn frá plöntum af sóldaggarætt sem nota klístur til að fanga bráð. Ólíkt kemískum varnarefnum getur óværan ekki myndað ónæmi fyrir þessu efni. Til þess þyrfti hún að þróa með sér stærri og sterkari líkama.

Vegna aukinnar landbúnaðarframleiðslu hefur notkun kemískra varnarefna aukist um fimmtíu prósent á síðustu þremur áratugum. Þar sem vísbendingar eru um eitrunaráhrif þeirra á lífverur og umhverfi hefur notkun sífellt fleiri kemískra efna verið bönnuð. Helsti kosturinn við notkun klísturs er sá að það mengar ekki út frá sér og er niðurbrjótanlegt.

Framkvæmd var tilraun á kögurvængjum, sem valda skaða á meira en fimm hundruð tegundum af grænmeti, ávöxtum og blómplöntum. Þar var sýnt fram á að meira en sextíu prósent þeirra festust í klístrinu á fyrstu tveimur dögunum og héldust droparnir klístraðir í margar vikur. Þá er verið að kanna hvort hægt sé að blanda lyktarefnum í efnið sem laðar að rántítur, en þær eru náttúrulegir óvinir dýra sem valda skaða á plöntum.

Nú þegar geta bændur keypt þær og nýtt sem lífrænar varnir.