Kjötsúpudagurinn á fyrsta degi vetrar

Kjötsúpudagurinn verður haldinn hátíðlegur á Skólavörðustíg, laugardaginn 26. október, fyrsta vetrardag.

Eins og venjulega verður boðið upp á rjúkandi heita íslenska kjötsúpu á Skólavörðustígnum. Þetta er 17. árið í röð sem vetri er fagnað á þennan hátt. Það eru sauðfjárbændur, Sölufélag garðyrkjumanna og rekstraraðilar og íbúar á Skólavörðustígnum sem bjóða gestum og gangandi að bragða á ilmandi, heitri og bragðgóðri súpu.

Alls munu 1.500 lítrar af súpu vera á boðstólum en það er rík hefð fyrir því að hún klárist.

Alls verður boðið upp á kjötsúpu á sjö stöðum á Skólavörðustígnum og það eru margir af fremstu matreiðslumönnum landsins sem gefa vinnu sína á þessum degi. Klukkan. 14 verður byrjað að gefa súpu á sjö stöðum.

Staðsetning súpustöðva:

• Fish and Chips Skólavörðustíg 8
• Kaffi Loki - Skólavörðustíg 23 (Fyrir utan Sölku Völku Fish & more)
• Krua Thai Skólavörðustíg 21a
• Ostabúðin - Skólavörðustíg 38
• Sjávargrillið - Skólavörðustíg 14
• Þrír Frakkar - Skólavörðustíg 9