Kjötmjöl og kúamykja betri áburðargjafi á eldri tún

Bræðurnir Ísak og Logi Jökulssynir á Ósabakka á Skeiðum gerðu áburðartilraunir þar sem blanda af kjötmjöli og kúamykju var notuð á tún, samanborið við tilbúinn áburð.

Raunin varð sú að blandan gefi betri uppskeru af eldri túnum en tilbúni áburðurinn. Tilraunin fór fram árin 2022 og 2023. Logi segir þannig ljóst að kjötmjölsblandan virki verr á nýrækt en tilbúni áburðurinn og sömuleiðis tilbúni áburðurinn verr á eldri tún en kjötmjölsáburðurinn.

Tilbúni áburðurinn töluvert verri á eldri tún

„Í raun virkar tilbúinn áburður verr á eldri túnum heldur en kjötmjölið, hver sem ástæðan er þá var miklu hentugra að dreifa kjötmjöli á gamla túnið okkar frekar en nýræktina þar sem kjötmjölið gaf meiri heildaruppskeru yfir sumarið,“ segir Logi.

„Á nýræktinni gaf tilbúni áburðurinn töluvert meiri uppskeru og var ódýrasta uppskeran á hektara en munurinn var minni í seinni slætti sem bendir til þess að áburðaráhrifin voru enn til staðar og munu líklega vera það enn lengur. Það er ekki alveg sanngjarnt að bera saman uppskeru eftir notkun á tilbúnum áburði og lífrænum áburði á einu ári því það tekur svo langan tíma fyrir næringarefnin í lífræna áburðinum að brotna niður í tiltæk form fyrir plöntur.“

Kjötmjölið gaf hæstu gildin

Logi segir ekki marktækan mun á gæðum uppskerunnar eftir áburðargjöfunum. „Enginn augljós munur sást í efnagreiningu heysýna allra útfærslna. Það var augljóst mynstur að sjá þegar efnainnihald jarðvegs úr öllum útfærslum var sett í töflu en þar var sú útfærsla sem fékk mesta kjötmjölið með hæsta gildið af næringarefnunum P, K, Ca, Mg, Na og Zn.

Kúamykjan og kjötmjölið blandaðist vel saman þótt ferlið væri óþjált. Engin vandamál komu upp í dreifingu á blöndunum með slöngubúnaðinum en mykjan var líka frekar þunn, eða um 3,5 prósent þurrefni.

Við viljum ekki endurtaka þessa tilraun því nota þurfti allt of mörg tæki og allt of margt fólk eins og þetta var gert hjá okkur. Þrjá traktora þurfti og einn lyftara og þrjá til fjóra starfsmenn. En með bættum búnaði væri hægt að auðvelda ferlið heilmikið. Heimildir benda til að hægt sé að bæta jarðveg með reglulegri notkun og áburðarblöndunni.“

– Sjá nánar HÉR