Kaupfélag Skagfirðinga lækkar verð til sauðfjárbænda um 36%

Kaupfélag Skagfirðinga hefur birt verðskrá fyrir komandi sláturtíð. Grunnverð á algengustu flokkum dilkakjöts er á bilinu 320-360 kr/kg. Verðlækkun er um 36% á milli ára í sumum flokkum. Ekki liggja fyrir upplýsingar um greiðslufyrirkomulag né sláturkostnað en álag er greitt á fyrstu vikum slátrunar. Sama verðskrá er birt á vef sláturhúss Kaupfélags Vestur-Húnvetninga, www.skvh.is.
 

Meðalverð á dilkakjöti fer úr 542 kr niður í 347 kr. Verð á öðru kjöti er óbreytt frá því í fyrra eða 116 krónur.


Verðskrá KS. Skjáskot af vef KS, www.ks.is

 

Gangi þessi lækkun yfir alla sauðfjárframleiðslu í landinu þýðir lækkunin ríflega 1.800 milljóna króna tekjuskerðingu fyrir sauðfjárbændur í heild.  

 

Það kemur til viðbótar tæplega 580 milljóna króna tekjuskerðingu í fyrra. Það þýðir að á tveimur árum hafa sauðfjárbændur mátt þola verðlækkun á sínum framleiðsluvörum sem nemur um 2,4 milljörðum króna.

 

Vandséð er hvernig búrekstur sauðfjárbænda þolir þann tekjusamdrátt sem er fyrirsjáanlegur. Tekjuhrun þýðir að margir sauðfjárbændur munu bregða búi og í einhverjum tilvikum fara í greiðsluþrot. Forystumenn sauðfjárbænda hafa unnið að aðgerðum og lagt tillögur fyrir ríkisvaldið til þess að bregðast við vandanum.

 

Enn sem komið er hafa stjórnvöld ekki svarað kalli bænda um tafarlausar aðgerðir til þess að mæta þeirri slæmu stöðu sem nú er uppi. Ef ekkert verður að gert blasir við mikill byggðavandi á þeim svæðum þar sem sauðfjárrækt er hryggjarstykkið í atvinnulífinu.

Á meðfylgjandi mynd má sjá dreifingu sauðfjárbúa um landið en brúnu deplarnir eru þau lögbýli þaðan sem fé hefur komið til slátrunar.


Bæir með skráða búsetu árið 2014 og staðir þaðan sem fé kom til slátrunar.
Heimild: Skýrsla RHA-Rannsóknamiðstöðvar Háskólans á Akureyri 2015.