Jólasveinar fara nýstárlegar leiðir á COVID-tímum

Jólasveinarnir sem blaðamaður Bændablaðsins hitti á dögunum á Akureyri léku við hvern sinn fingur og skemmtu nærstöddum með gleði og sögum. Þeir upplifa óvenjulega tíma eins og allir landsmenn en láta engan bilbug á sér finna í aðdraganda jólanna og hafa sumir hverjir aðlagast tækniöldinni með góðu árangri.

Einlæg stund með börnunum á Zoom

Blaðamaður Bændablaðsins náði tali af jólasveininum Skyrgámi sem er tæknivæddur með meiru og heldur úti heimasíðunni skyrgamur.is

„Það hefur gengið ágætlega hjá okkur, við höfum heimsótt leikskólana og brugðið á leik með börnunum á útisvæðum eða kíkt á gluggana. Það hefur lítið farið fyrir jólaböllum og heimsóknum til fyrirtækja á þessu ári. Áherslurnar hafa meira verið á heimahúsin í smærri einingum. Einnig höfum við boðið upp á Zoom-fundi sem hafa svo sannarlega slegið í gegn. Það er einlæg og góð stund með börnunum sem í dag eru alin upp við að tala í gegnum myndsíma þannig að fyrir þeim er það ósköp eðlilegt. Það er fyrirkomulag sem er komið til að vera og verður vinsælt á næstu árum höfum við bræðurnir trú á,“ segir Skyrgámur sem bregður sér einnig í líki gömlu jólasveinanna, er alltaf í lopapeysu undir rauða sparigallanum eins og hann segir sjálfur.