Jólaföt á grænum nótum
Vistvænt jóladress er eitthvað sem ætti að vera efst á listanum um þessar mundir, enda hjá of mörgum orðin áskorun að standast linnulaust aðdráttarafl neysluhyggjunnar.
Nú þegar hátíðarblær jólanna ætti að umlykja okkur vill bera við að hraðtíska og fjöldaframleiðsla hins ýmiss varnings varpi skugga á hinn sanna kjarna árstíðarinnar. Innan um verslunaróreiðuna skín nefnilega í blik af töfrum sem býður okkur að enduruppgötva gleðina sem stafar af ígrunduðu vali og felur í sér þá breytingu sem við viljum sjá. Kaupum vandað, endurnýtum og látum gott af okkur leiða af bestu getu.
Með kolefnissporið bak við eyrað
Eins og staðan er núna er víst of seint að ætla sér að versla mikið yfir netið en fyrir þá sem eiga leið út fyrir landsteinana má leita fanga ferðalaginu. Ef svo vill til að einhver eigi leið um Kanada, má athuga verslun sem kallast Wild Rose & Sparrow. Eigendurnir eru gott dæmi um leiðendur sjálfbærrar tísku, en öll starfsemi Wild Rose & Sparrow, þar á meðal höfuðstöðvar, verkstæði og hönnunarstofa, knúin áfram af 100% endurnýjanlegri orku. Á vefsíðu þeirra kemur m.a. fram að þeir kolefnishlutleysi hverja sendingu sem frá þeim fer og gæti þess að framleiða afar lítið magn fatnaðar í einu. Einnig er einstakt úrval fallegra kjóla í hinum ýmsu litum á verðbilinu 30–40 þúsund krónur.
Í Los Angeles-ríki Bandaríkjanna má finna lítið fjölskyldurekið fyrirtæki sem heitir Miracele Eye. Þar sitja við saumana fjórar konur og einn karlmaður, öll af suður-amerísku bergi brotnu og öll afar handlagin. Fjölskyldan nýtir hágæða efnisstranga sem hafa orðið afgangs hjá hinum ýmsu verksmiðjum í gegnum tíðina, alveg frá sjöunda áratugnum og upp úr. Í versluninni má því finna mikið úrval af skemmtilegum samfestingum og kjólum sem eiga það sameiginlegt að gleðja bæði þann sem þeim klæðist en einnig aðra viðstadda.
Verðlagið er að sama skapi ekki óskemmtilegt, eða í kringum 30 þúsund krónurnar. Fyrir áhugasama má kíkja á vefsíðuna www.shopmiracleeye.com en hún er ansi lífleg.
Hátíðarklæði finnast víða
Fyrir þá sem eiga ekki heimangengt má líta sér nær. Nytja- og endursöluverslanir hafa rutt sér til rúms víða um land og þar má finna bæði gull og ýmsar gersemar ef vel er leitað. Yfir netið er hægt að gera góð kaup, meðal annars á samfélagsmiðlum, en þar má finna ýmsa hópa endursölu, til að mynda hópinn „Merkjavara föt, skór & aukahlutir á Facebook fyrir þá sem vilja vandaða vöru. Á höfuðborgarsvæðinu eru svo verslanir sem hafa skemmtilegt úrval „vintage“ fatnaðar, t.a.m. hin sígilda verslun Spúútnik sem hefur verið starfandi í áraraðir og Wasteland sem bættist við fyrir ekki löngu. Aftur er klassísk og vönduð verslun sem einnig hefur verið rekin í áraraðir, stofnuð í Reykjavík árið 1999, en allar hennar vörur eru bæði hannaðar og framleiddar á Íslandi. Aftur hefur alla tíð nýtt endurunninn textíl í hönnun sína og hver flík er því bæði tímalaus og einstök.
Fyrir neytendur sem vilja láta sérstaklega gott af sér leiða má ekki gleyma Elley, verslun á Seltjarnarnesi, sem er alfarið rekin í sjálfboðastarfi og rennur allur ágóði sölu hennar óskiptur til Kvennaathvarfsins, en einnig er hægt að leigja þar hátíðarklæði.
Til viðbótar er dýrindis fatamarkaður í Konukoti, Eskihlíð 2–4, alla laugardaga árið um kring á milli kl. 12–16 og rennur allur ágóði sölunnar til starfsemi Konukots.
Gleðileg jól.
