Hófu seinni slátt í júní
„Það stefnir allt í gríðarlegan heyfeng um land allt, einu undantekningarnar eru þar sem ríkja sérstakar aðstæður eins og vegna kals sem á við um einstaka bæi,“ segir Sigurgeir Hreinsson formaður Búnaðarsambands Eyjafjarðar. Nýliðinn júní mánuður var einstaklega hlýr víðast hvar og raunar voru bæði hita- og úrkomumet sett í þeim mánuði.
Bændur í Eyjafirði hafa margir lokið fyrsti slætti og náðu margir að klára síðustu dagana í júní, en það segir Sigurgeir raunar ekki óvenjulegt hin síðari ár í kjölfar þess að ný tæki og tækni hafa rutt sér til rúms við heyskap. Sér vitanlega hafi bændur hins vegar ekki náð að hefja annan slátt í júní, en bændur á Hríshóli í Eyjafjarðarsveit hófu slátt öðru sinni þetta sumarið síðustu dagana í júní. „Það er heldur óvenjulegt og að ég held einsdæmi,“ segir hann.
Víða þarf að slá þrisvar í sumar
Þessi staða gerir að verkum að víða þarf að slá þrisvar og því má búast við að heyfengur verið með allra besta móti þegar upp verði staðið í haust. „Það stefnir allt í að heyfengur verið gríðarmikill eftir sumarið. Ég velti kannski meira fyrir mér núna hver gæði heysins verða en magnið,“ segir Sigurgeir en bætir við að vissulega hafi margir náð mjög fínum heyjum, en annars staðar hafi gras sprottið úr sér.
„Það er auðvitað ekki tímabært á þessari stundu að hafa áhyggjur af því hvort not verið fyrir allt það hey sem fæst eftir sumarið,“ segir Sigurgeir.
