Heklaður skvísukragi

Hér er uppskrift að Hekluðum skvísukraga úr smiðju Elínar Guðrúnardóttur.

 

Garn: Whistler frá Garn.is

Heklunál: 4 mm

1 dokka ætti að duga í tvo kraga og kostar dokkan 199 kr.

Aþena, systurdóttir mín, er 3 ára skvísa sem hefur gaman af því að klæða sig upp og vera fín. Nú er sumar og nýtur Aþena þess að geta verið í kjól og þurfa ekki að fela glingur og skart undir peysu eða jakka. Bleikur er uppáhalds liturinn hennar Aþenu og vakti bleiki kraginn sem ég heklaði handa henni mikla lukku.

Þessi kragi er heklaður eftir uppskrift sem birtist í Bændablaðinu 2013, en ég breytti uppskriftinni aðeins til þess að hann hentaði betur yngri skvísum.

 

Uppskrift:

Uppskriftin er þannig að hægt er að hafa kragann í hvaða stærð sem er. En passa þarf upp á lykkjufjöldinn gangi upp í 7 til þess að mynstrið gangi upp. Til viðmiðunar var ég með 63 og 77 loftlykkjur í krögunum sem ég heklaði, að auki er svo bætt við 5 loftlykkjum til þess að gera hnappagat.

Fitjið upp margfeldið af 7 þar til æskilegri stærð er náð, þá er bætt við 5 LL.

 

1. umf: Heklið 1 FP í 6. LL frá nálinni 

(hnappagat gert), 1 FP í hverja LL út umf. 

Ég hekla í hnúðinn aftan á loftlykkjunum í stað þess að hekla framan í loftlykkjurnar, þetta geri ég til þess að hálsmálið sé fallegra.

2. umf: Heklið 1 LL, *1 FP í næstu 6 L, 2 FP í 

næstu L (útaukning gerð)*, endurtakið frá * að * út umf, en heklið aðeins 1 FP í síðustu L umf í stað þess að gera 2 FP.

3. umf: Heklið 1 LL, 1 FP í allar L út umf.

4. umf: Heklið 3 LL (telst sem 1 ST), sl. 2 L, 

*[1 ST, 3 LL, 1 ST] saman í næstu L, sl. 3 L*, endurtakið frá * að * þar til aðeins 3 L eru eftir, þá er sl. 2 L og heklað 1 ST í síðustu L. 

5. umf: Heklið 3 LL, sl. 2 L *[2 ST, 4 LL, 2 ST] 

saman í næsta LL-bil, sl. 2 L*, endurtakið frá * að * út umf, heklið 1 ST í 3. LL af þeim þrem sem heklaðar voru í byrjun síðustu umferðar.

*Hnúður: Heklið 4 LL, 1 KL í 1. LL

6. umf: Heklið 1 LL, 1 FP í 1. L, sl. 2 L, *[3 ST,

 hnúður, 3 ST] saman í næsta LL-bil, sl. 2 L, 1 FP á milli ST, sl. 2 L*, endurtakið frá * að * út umf, ekki næst að klára síðustu endurtekninguna að fullu, í lokin er heklaður 1 FP í 3. LL af þeim þrem sem heklaðar voru í byrjun síðustu umferðar.

Slítið frá, gangið frá endum og saumið töluna á.

Fleiri myndir er að finna á www.garn.is og þar er einnig hægt að nálgast þessa uppskrift í rafrænu formi.

 

Góða skemmtun! − Elín Guðrúnardóttir